Pjesëtari i VV-së që gjuajti me armë zjarri nxënësin, sot pjesë e tubimeve të kësaj partie (Foto)

Profesori i Shkollës Profesionale “Selajdin Mullaabazi-Mici” në Rahovec, Azbi Gashi, është akuzuar për përdorim të armës dhe për armëmbajtje pa leje. Ai ka shtënë me armë pas një përleshjeje me një nxënës të shkollës së tij, shkruan Express.

Azbi Gashi, asamblist i Lëvizjes Vetëvendosje në Rahovec, u arrestua nga policia më 24.05.2015 dhe u mbajt në arrest shtëpiak deri më 24.06.2015. E po ky i njëjti, u pa të mërkurën (7 qershor) në një tubim të LVV-së në Rahovec.

Departamenti për Krime të Rënda i Gjykatës Themelore të Gjakovës kishte vendosur që ndaj të pandehurit Azbi Gashi nga fshati Bellacërkë i Rahovecit të caktohet masa e arrestit shtëpiak për shkak të dyshimit të bazuar se ka kryer veprën penale të përdorimit të armës apo mjetit të rrezikshëm.

“I pandehuri do të mbahet në arrest shtëpiak në kohëzgjatje prej 1 (një) muaji, i cili do të llogaritet prej kohës së arrestimit, data 24.05.2015 dhe do të zgjasë deri më datën 24.06.2015”, thuhej në aktvendimin e kësaj Gjykate.

Në anën tjetër, kryeprokurori i Gjakovës Ali Selimaj pati sqaruar se zënka me të shtëna në mes profesorit dhe nxënësit të shkollës ka ardhur pas një konflikti që nxënësi me mësuesin e kanë pasur para dhjetë ditësh në ekskursionin e shkollës në Prishtinë.

“Mësuesi pas këtij konflikti ka deklaruar se është ndier i frikuar dhe ka bartur armën me veti. Kur konflikti ka eskaluar të dy kanë dalë jashtë oborrit, ndërsa mësuesi  e ka nxjerrë revolen dhe ka shtënë me të,” ka thënë kryeprokurori Selimaj.

Kjo është video e shpërndarë nga Vetëvendosje në tubimin e sotëm (e mërkurë) në Rahovec, nga ku u nxor fotografia më lart: