Pikat kryesore të marrëveshjes LVV-LDK, e cila nesër dërgohet për miratim në të dy këshillet e përgjithshëm

Lëvizja Vetëvendosje dhe Lidhja Demokratike e Kosovës tashmë e kanë arritur marrëveshjen e koalicionit, e cila shumë shpejtë do të bëhet publike edhe zyrtarisht nga këto parti.

Gazeta Online Reporteri.net, nga burime brenda këtyre partive ka mësuar se LVV e LDK tashmë kanë thirrur mbledhje të këshilleve të tyre të përgjithshme për ditën e nesërme, ku marrëveshja do të dërgohet edhe për votim formal.

Siç ka raportuar edhe në mëngjes Gazeta Reporteri, LVV ka pranuar që të heq dorë nga posti i kryetarit të Kuvendit, ku Glauk Konjufca do të jap dorëheqje, që këtë pozitë ta marrë Vjosa Osmani e LDK’së.

Pikë tjetër e marrëveshjes që dihet deri tani, gjithnjë në bazë të burimeve, është numri i ministrive, i cili është shtuar në 15 sosh, ku të dy partitë kryesore do t’i kenë nga 6 ministri, ndërsa 3 të tjera do të iu takojnë minoriteteve.

Gjithashtu, Reporteri.net ka mësuar edhe disa nga emrat e ministrave, ku në mesin e tyre do të jetë edhe Glauk Konjufca, si Ministër i Punëve të Jashtme, ndërsa Ministër i Infrastrukturës do të jetë Lumir Abdixhiku, e i Forcës së Sigurisë së Kosovës, Anton Quni.

Kujtojmë se Kryesia e Kuvendit të Kosovës, me kërkesën e Albin Kurtit ka vendosur që të hënën nga ora 11:00, të mbahet seanca ku do të votohet qeveria e re me kryeministër Albin Kurtin.