Vdes mamia llapjane Sanije Topanica, iu ndihmoi grave në lindje gjatë luftës
PDK-ja thotë se kanë shumë fakte për manipulime të VV-së, duan rivotim në Prizren
Anëtari i kryesisë së PDK-së, Blerand Stavileci, së bashku me përfaqësuesin e partisë në KQZ, Blerim Gjoshin, dhe kryetarin e degës në Prizren, Kujtim Gashin, kanë mbajtur një tjetër konferencë për media, për të denoncuar parregullsitë që, sipas tyre, kanë ndodhur gjatë balotazhit në Prizren.
Stavileci ka vazhduar të akuzojë Vetëvendosjen për manipulime në rundin e dytë të zgjedhjeve në Prizren, ndërsa për këtë ai pohon se kanë fakte, të cilat do t’i dorëzojnë në Panelin Zgjedhor për Ankesa dhe Parashtresa.
“Ne do t’i ndjekim të gjitha rrugët ligjore për të denoncuar ato përsëri me mjete juridike siç do ta bëjmë edhe sot në PZAP në mënyrë që të mbrohet vullneti i qytetarëve të Prizrenit”, ka thënë Stavileci.
Ai thotë se PDK-ja ka fakte se Vetëvendosja ka përdorur “trenin bullgar” në ditën e zgjedhjeve.
Sipas Stavilecit, kundërshtimi i Vetëvendosjes për t’i rinumëruar votat në këtë komunë, tregon frikën që kjo parti ka nga rezultati që mund të dalë dhe është një tjetër sinjal i manipulimeve të tyre.
Ai përmend akuzat që LVV-ja ka bërë gjithmonë ndaj partive tjera dhe veprimet që janë ndërmarrë, qoftë edhe për parregullsitë më të vogla në zgjedhje të tjera, ndërsa shton se e njëjta duhet të ndodhë edhe me LVV-në.
Përderisa Stavileci kërkon me ngulm rinumërim të votave, përfaqësuesi i PDK-së në KQZ, Blerim Gjoshi, zgjeron kërkesat e këtij subjekti. Ai thotë se Prizreni duhet të shkojë në rivotim.
“Në Prizren ka pasur manipulim të procesit zgjedhor. Është vërtetuar gjatë numërimit të votave me kusht në QNR, ku kanë munguar tri fletëvotime. Do të thotë që këto janë përdorur për fenomenin e trenit bullgar, për të ndryshuar vullnetin e qytetarit. Ka dëshmi të shumta që në Prizren ka pasur devijim të vullnetit qytetar. Persona të ndryshëm, që nuk kanë pasur të drejtë kanë qenë pjesë e procesit zgjedhor. Kemi plot fakte për këto gjëra, të cilat do t’ia dorëzojmë PZAP-it. Ne i bëjmë thirrje PZAP-it që në mënyrë të drejtë të administrojë krejt materialin që kemi dorëzuar. Mendojmë që e vetmja zgjidhje është të çohet vullneti i qytetarëve në vend, rrjedhimisht rivotimi në Prizren. Ne nuk i frikësohemi asnjëherë procesit zgjedhor”.
