PDK-ja në Podujevë ende pa kandidat për kryetarë

Komisioni Qendror i Zgjedhjeve është duke vazhduar të pranoj aplikimet e subjekteve politike për t’u certifikuar në zgjedhjet lokale.

Zëdhënësi i KQZ-së, Valmir Elezi ka bërë të ditur sot për Telegrafin, se periudha e aplikimit të subjekteve politike për t’u certifikuar për pjesëmarrje në zgjedhjet lokale të 17 tetorit si dhe për dorëzimin e listës me emrat e kandidatëve për Kryetar Komune apo për Kuvende Komunale, përfundon më 16 gusht.

E kur kanë mbetur edhe një javë kohë deri në përmbyllje të këtij procesi, partitë politike ende nuk kanë zyrtarizuar kandidatët për kryetarë në të gjitha komunat e Kosovës.

Tri partitë opozitare PDK, LDK dhe AAK deri tash kanë zyrtarizuar shumicën e kandidatëve për komuna, kurse LVV e cila aktualisht është në pushtet, deri më tani nuk ka zyrtarizuar asnjë kandidat në asnjërën prej komunave të Kosovës.

Në Podujevë I vetmi subjekt që ende nuk e ka zyrtarizuar kandidatin për kryetar të Komunës është PDK-ja, pasi që subjektet tjera I kanë zyrtarizuar kandidaturat.

Kujtojmë se deri më tani ky subjekt është edhe pa kryetar dege pas dorëheqjes së Naim Fetahut nga kjo pozitë pas hubjes në zgjedhjet e jashtëzakonshme për kryetar të Podujevës.

Deri më tani në garë janë Shpejtim Bulliqi nga VV, Ekrem Hyseni nga LDK, Besnik Tahiri nga AAK, Gazmend Islami nga BKD, Xhemajl Hasani nga NISMA.