Pas kontrollave dhe gjobave që u shqiptuan nga Inspekcioni në Podujevë, gastronomët po e zbatojnë Ligjin kundër duhanit

Më datën 26 prill inspekcioni komunal dhe ata nga niveli qëndrorë të mbështetur nga policia e Kosovës kanë zhvilluar një aksion në të gjitha kafiteritë dhe restoranet në qytetin e Podujevës, transmeton PodujevaPRESS.net

Gjatë këtij aksioni inspeksioni ka gjobitur shumë biznese pasi që konsumohej duhani brenda ambienteve të lokaleve e çka është e ndaluar me Ligj.

Por, çka thotë ligji?

Ligji për Kontrollin e Duhanit, ka hyrë në fuqi tash e 10 vjet. Qëllimi i këtij ligji, siç shkruan pikërisht aty thuhet të jetë: “mbrojtja e shëndetit publik, të gjeneratave të tanishme dhe të ardhshme nga pasojat shkatërruese shëndetësore, sociale, ekonomike dhe mjedisore të konsumimit të duhanit dhe ekspozimit ndaj tymit të duhanit, me këtë ligj përcaktohen masat për ndalimin, kufizimin e përdorimit të produkteve të duhanit, përbërësve të duhanit, parandalimin e pasojave të dëmshme nga përdorimi i produkteve të duhanit dhe mbikëqyrjen për zbatimin e ligjit”.

Neni 11, e rregullon mbrojtjen nga ekspozimi ndaj tymit të duanit.

Aty përcaktohet saktësisht se si dhe ku ndalohet pirja e duhanit.

“Ndalohet pirja e duhanit në: 1.1. hapësirë publike; 1.2. hapësirë të punës; 1.3. mjetet e transportit publik; 1.4. hapësirat e hapura të përcaktuara në paragrafin 3. të këtij neni.”- thuhet fillimisht në këtë nen.

Në fakt, aty përcaktohet ndalimi i pirjes së duhanit edhe në ndërtesa me banesa shumëkatëshe. Pra nuk lejohet pirja e duhanit në hapësirat e përbashkëta të ndërtesës.

Tutje, stadiumi i futbollit është një vend tjetër, që specifikisht përmendet në ligj, e që nuk lejohet pirja e duhanit.

E rëndësishme të dihet, gjithashtu: As pajisjet e tjera, që prodhojnë nikotinë apo ndonjë substancë tjetr që rrjedh nga duhani, nuk lejohen dhe i nënshtrohen po të njetave rregulla sikurse duhani.

“Ndalesat e pirjes së duhanit të përcaktuara në këtë nen do të aplikohen edhe në përdorimin e ndonjë pajisje që prodhon emisione të nikotinës apo ndonjë substance tjetër që rrjedh nga duhani, përveç nëse ajo pajisje është lejuar për përdorim nga ministria si terapi për zëvendësimin e nikotinës apo për qëllime tjera mjekësore” – thuhet në ligj.

Tutje në ligj theksohet se me akte nënligjore rregullohet, pjesa e hapsirave që mund të krijohet për duhan pirësit, si dhe spcifikat që duhen përmbushur që një gjë e tillë të lejohet.

Sa të larta janë gjobat, e kush e mbikëqyr dhe ekzekuton këtë ligj

Personi juridik, pra në këtë rast kafiteritë (sidomos), që e shkelin këtë ligj, dënohen me gjobë prej 3 mijë eurove.

Personi fizik që e shkel këtë ligj, dënohet me gjobë prej 50 euro.

Ligjin për duhanin e zbatojnë inspektorët qendror dhe komunal, si dhe disa organe të tjera: inspektorët sanitarë, inspektorët shëndetësorë, inspektorët e tregut, inspektorët e punës, inspektorët e arsimit, inspektorët të transportit, Agjencioni kundër korrupsionit si dhe Policia e Kosovës.

Mbetet të shihet nëse kësaj rradhe, kjo iniciativë e ministrit Peci, e që po e zbaton edhe Shpejtim Bulliqi si kryetar i Podujevës përmes inspekcionit, vërtetë do të respektohet, apo kjo zbatueshmëri do të vlejë vetëm për disa javë, siç ka ndodhur në të kaluaren, në Podujevë.