Partive politike që do garojnë për Podujevën u kufizohen shpenzimet për fushatë

Komisioni Qendror i Zgjedhjeve ka vendosur që 43 mijë e 433 euro të jetë shuma më e lartë që do të mund ta shpenzojnë subjektet politike në fushatën zgjedhore në Podujevë.

Një vendim i tillë u mbështetet në listën jo-përfundimtare të votuesve të kësaj komune, sipas së cilës numri i tyre është 86 mijë e 866.

Kryeshefi ekzekutiv i Sekretariatit të KQZ-së, Yll Buleshkaj, tha se sipas rregullës zgjedhore të KQZ-së për kufizimin e shpenzimeve të fushatës dhe deklarimit financiar shpenzimi i lejuar është 0.5 euro për votues të regjistruar.

“Sipas listës së parë preliminare të votuesve të cilën e kemi pranuar nga Agjencioni i Regjistrimit Civil për komunën e Podujevës mund të votojnë 86 mije e 866 votues. Legjislacioni ynë e parasheh që për secilin votues partitë konkurruese mund të shpenzojnë gjysmë euro, ndërsa llogaritja i bie që të gjitha subjektet politike që do jenë konkurrente për kryetar të Podujevës mund të shpenzojnë maksimum 43 mijë e 433 euro”, tha ai.

Kurse, anëtari i KQZ-së nga radhët e koalicioni Nisma-AKR-PD, Eshref Vishi kërkoi që i gjithë materiali zgjedhor të kalojë në KQZ para se të shtypet, me qëllim të mos ketë gabim teknik siç ka ndodhur në zgjedhjet e 6 tetorit.

“Sa i përket materialeve fillojnë pas miratimit të buxhetit dhe pas zotimit të mjeteve financiare për zhvillimin e aktiviteteve, sekretariati ka punë intensive me aktivitetet prokuruese duke marr parasysh edhe afatet e shkurta është mirë që materialet e përgatitura të draftuara të kalojnë edhe në Këshilla dhe Komisionin Qendror të Zgjedhjeve para procedimit për shtyp. Fjala është për formularët e rezultateve. Në pjesën e formularit ku renditen subjektet politike garuese në këto zgjedhje kandidatët për kryetar kemi numrin e garuesit, të subjektit, llogon e subjektit, emrin e plotë të subjektit akronimin si dhe rubrikën e shënimit të votave. Këtë e shtroi për dy arsye e para le të jetë KQZ filtri i fundit për korrigjim eventual të ndonjë lëshimi apo gabimi teknik që mund të përvidhet, e dy marrja e përgjegjësisë edhe nga ana jonë si anëtarë të KQZ”, tha ai.

Se kush do jenë kandidatët që do garojnë për të parin e komunës së Podujevës ende nuk dihen, por që partitë politike kanë afat deri më 17 shkurt t’i bëjnë të ditur kandidatët e tyre.

Ditë më parë Komisioni Qendror i Zgjedhjeve ka vendosur që fushata zgjedhor për zgjedhjet e jashtëzakonshme në Podujevë, të nis nga 3 deri më 13 mars, ku më 15 mars pastaj votuesit e këtij qyteti do mund të votojnë.

Deri tek zgjedhjet e jashtëzakonshme në komunën e Podujevës erdhi pasi që ish kryetari i saj nga radhët e LDK-së, Agim Veliu është bërë pjesë e kabinetit qeveritar, si ministër i Punëve të Brendshme.