Paralajmërimi i kryeministrit për rritje të pagave, premtim parazgjedhor

Paralajmërimi se do të ketë rritje pagash në disa sektorë publik është vetëm një premtim parazgjedhor.

Kështu cilëson njohësi i çështjeve ekonomike të Kosovës, Ibrahim Rexhepi pas kërkesës së kryeministrit të Kosovës, Isa Mustafa që Ministria e Financave në koordinim me Fondin Monetar Ndërkombëtar të propozojë mundësi të rritjes së pagave në sektorin e arsimit dhe të shëndetësisë.

Në një prononcim për Indeksonline, Rexhepi numëron arsyet pse një gjë e tillë është e pamundur.

“Mundësia e rritjes se pagave, ashtu si ka propozuar kryeministri, nuk është asgjë tjetër pos një premtim parazgjedhor. Ky propozim na përkujton sjelljet e kryeministrit paraprak, i cili para shpalljes së zgjedhjeve premtonte rritje pagash e pensionesh. Nëse kemi parasysh realitetin ekonomik nuk konsideroj se ka hapësirë për rritjen e pagave, meqenëse shtimi i të hyrave në buxhetin e shtetit nuk vjen nga rritja ekonomike, por nga rritja e importit, përkatësisht të hyrat në kufi”, ka thënë Rexhepi.

Pos kësaj, ai thotë se Qeveria duhet pasur parasysh se vendi ende ka shkallë të lartë të papunësisë dhe të varfërisë dhe fokusi i saj do të duhej të jetë ndalja e këtyre trendëve, e jo shpenzimi i parasë publike për nevoja elektorale.

Pavarësisht fushatës parazgjedhore, sipas Rexhepit kryeministri do duhej te ketë qëndrim korrekt ndaj gjithë qytetarëve, e jo vetëm ndaj atyre që kanë përfitimet direkte nga buxheti.

“Prandaj, pa marrë parasysh mundësinë për zgjedhje të parakohshme dhe nevojën për vota, kryeministri duhet të mbaj qëndrim korrekt ndaj të gjithë qytetarëve të Kosovës, e jo vetëm ndaj atyre që kanë përfitime direkt nga buxheti. Zgjidhja nuk qëndron në faktin se sa do të përfitojnë 82 mijë veta qe financohen nga buxheti, por në nxitjen e zhvillimit ekonomik, te punësimit dhe të uljes së varfërisë, prej nga përfiton e tërë popullata”, ka shtuar Rexhepi.

Ai ka përkujtuar edhe rritjen e pagave në këto sektorë gjatë viteve të kaluar, duke thënë se rritja e tyre ka qenë me e lartë se rritja ekonomike./Indeksonline/