Pak ditë më parë u fut eksploziv dhe armë në aeroport, sot MPB-ja thotë se siguria është në nivel

Dështimi i sigurisë në aeroport u raportua në media, e për këtë dolën me sqarim edhe MPB-ja.

“Menjëherë pas përfundimit të testit i cili ka pasur për qëllim matjen e sigurisë në ANP, ministri i Punëve të Brendshme dhe ekspertët e kësaj fushe, i kanë prezantuar drejtorit të Aeroportit Ndërkombëtar të Prishtinës “Adem Jashari” (ANP) dhe atij të Agjencisë së Shërbimit të Navigimit Ajror të Kosovës (ASHNA), të gjitha të gjeturat nga testi, si dhe të gjitha rekomandimet e dhëna nga Departamenti për Siguri Publike-MPB. Me këtë rast të dy subjektet kanë ndërmarrë veprime konkrete të menjëhershme përkitazi me të gjeturat e këtij testi”, thuhet në njoftimin e Ministrisë.

Me këtë, MPB-ja ka konfirmuar raportimet për dështim të sigurisë, mirëpo çka bie në sy është sqarimi për gjendjen e sigurisë. Ani pse dështimi ka ndodhur disa ditë më herët, MPB-ja thotë se sot siguria është brenda standardeve.

“MPB-ja siguron qytetarët e Republikës së Kosovës, se tani sistemi i sigurisë në Aeroportin Ndërkombëtar të Prishtinës “Adem Jashari” dhe në Agjencinë e Shërbimit të Navigimit Ajror, është brenda standardeve të parapara’, thuhet më tutje aty.
Ndërkohë, Ministria bëri të ditur edhe arsyen pse nuk u bë publik ky test. Ata thonë se realizimi, raportet dhe rekomandimet për testet infiltruese janë konfidenciale dhe kjo është arsyeja që nuk janë bërë publike.

Ndryshe, para disa ditësh dy persona arritën të futeshin në aeroplan me eksploziv dhe me armë. Mirëpo, për fatin e mirë, këta ishin vetëm testues të sigurisë në aeroport.