Vdes mamia llapjane Sanije Topanica, iu ndihmoi grave në lindje gjatë luftës
Pacolli ua lëshon mjekrën komandantëve, e çon në shtëpinë e tij luksoze kryediplomatin gjerman
Ministri i Jashtëm i Kosovës, Behgjet Pacolli, ka arritur ta ketë mysafir në shtëpinë e tij kryediplomatin gjerman Sigmar Gabriel, i cili dje erdhi për vizitë në Kosovë. Përveç Pacollit dhe bashkëshortes së tij, në fotografitë që ka postuar në Facebook vërehen pjesëtarë të delegacionit gjerman dhe mysafirë të tjerë. Por, aty nuk ka pasur vend për liderët komandantë të skenës politike të Kosovës
Përveç takimit në institucione, kryediplomati kosovar Behgjet Pacolli ka ftuar në vilën e tij në Hajvali Sigmar Gabriel kryediplomatin e Gjermanisë, një prej fuqive më të mëdha ekonomike të botës.
Por, është interesante që në këtë darkë nuk ka pasur ftesa për liderët tjerë të Kosovës, Presidentin Hashim Thaçi, kryeministrin Ramush Haradinaj, kryeparlamentarin Kadri Veseli, të cilët Pacolli megjithatë i kishte gostitur në shtëpi bashkë me komplet Qeverinë.
Ministri i Jashtëm në një postim në Facebook ka zbuluar se çfarë ka biseduar me mysafirin e tij nga Gjermania.
“Kënaqësi të kem sonte për darkë, në shtëpinë time, ministrin e Punëve të Jashtme të Gjermanisë Dr. Sigmar Gabriel. Gjermania është një nga aleatët dhe përkrahësit tanë më të mëdhenj. Temat e diskutimit ishin mes tjerash Shtetndërtimi i Kosovës, perspektiva Euro-Atlantike, Liberalizimi i vizave, veriu i Kosovës si dhe çështja e demarkacionit të cilën kërkojnë të zgjidhim sa më parë”, ka shkruar Pacolli.
