Osmani për marrëveshjen Izrael-Hamas: Trump tregoi lidership të vërtetë për të sjellë paqe

Presidentja e Kosovës, Vjosa Osmani e ka vlerësuar si moment përcaktues për paqen lajmin që Izraeli dhe “Hamasi” kanë thënë se kanë arritur marrëveshjen e shumëpritur për armëpushim dhe lirimin e pengjeve.

Me titull “Të bekuar janë paqebërësit!”- e ka nisur Osmani mirënjohjen e saj në lidhje me këtë lajm.

Reuters ka raportuar në mëngjesin e së enjtes 09.10.2025, që kjo është faza e parë e planit të presidentit amerikan, Donald Trump, që t’i jepet fund luftës në Gazë.

“Një moment përcaktues për paqen. Paqe që është urgjente. Paqe që është vonuar shumë”- ka shkruar Osmani në “X”, duke e shpërndarë postimin e Trumpit.

Osmani ka shprehur mirënjohjen ndaj presidentit amerikan Donald Trump.

“Presidenti Donald Trump dhe Administrata e tij kanë treguar lidership dhe angazhim të vërtetë për të sjellë paqe të qëndrueshme për izraelitët dhe palestinezët njësoj, dhe përkushtim të palodhur për t’i dhënë fund vuajtjeve që kanë duruar breza të tërë njerëzish të pafajshëm”- ka shkruar Osmani.

Sipas saj, mirënjohja shkon gjithashtu për ndërmjetësuesit nga Katari, Egjipti dhe Turqia për angazhimin e tyre të vazhdueshëm për paqen dhe për rolin e tyre vendimtar në bërjen e mundur të këtij përparimi.

Vetëm një ditë pas dyvjetorit të sulmit ndërkufitar të militantëve të “Hamasit” që kishte nxitur sulmin shkatërrues të Izraelit në Gazë, bisedimet indirekte në Egjipt rezultuan me një marrëveshje për fazën fillestare të kornizës 20-pikëshe të presidentit Trump për të sjellë paqe në enklavën palestineze, raportoi Reuters.

Marrëveshja, nëse zbatohet plotësisht, do t’i afronte të dy palët më shumë se çdo përpjekje e mëparshme për të ndalur luftën që kishte evoluar në konflikt rajonal, duke tërhequr vende si Irani, Jemeni dhe Libani, dhe duke thelluar izolimin ndërkombëtar të Izraelit dhe riformësuar Lindjen e Mesme.

Lajmi për marrëveshjen ka nxitur festime në Izrael, Gazë dhe më gjerë, me familjet izraelite të pengjeve që hodhën fishekzjarrë, ndërsa palestinezët duartrokitën dhe brohoritën me shpresën se do t’i jepet fund gjakderdhjes.

“Falënderimi i qoftë Zotit për armëpushimin, fundin e gjakderdhjes dhe vrasjeve”, ka thënë Abdul Majeed abd Rabbo, një burrë në qytetin jugor të Gazës, Khan Younis.

“Nuk jam i vetmi njeri i lumtur, i gjithë Rripi i Gazës është i lumtur, i gjithë populli arab, e gjithë bota është e lumtur për armëpushimin dhe fundin e gjakderdhjes”.

Por marrëveshja e shpallur nga Trump kishte pak detaje dhe la shumë pyetje të pazgjidhura që mund të çojnë në prishjen e saj, siç ka ndodhur me përpjekjet e mëparshme të paqes.

“Jam shumë krenar të njoftoj se Izraeli dhe ‘Hamasi’ kanë nënshkruar Fazën e parë të Planit tonë të Paqes”, ka shkruar Trump në Truth Social.

“Kjo do të thotë që të gjitha pengjet do të lirohen shumë shpejt dhe Izraeli do të tërheqë trupat në vijën e dakordësuar, si hapat e parë drejt një paqeje të fortë, të qëndrueshme dhe të përjetshme”, ka shtuar Trump.

Jetësimi me sukses i marrëveshjes do të shënonte arritje të rëndësishme në politikën e jashtme për presidentin republikan, i cili kishte bërë fushatë me premtimin se do të sillte paqe në konfliktet e mëdha botërore, por ka pasur telashe që ta jetësojë, si në Gazë, ashtu edhe në Ukrainën e pushtuar nga Rusia.

Kryeministri izraelit, Benjamin Netanyahu, ka deklaruar se do të mbledhë qeverinë e tij të enjten për ta miratuar marrëveshjen.

“Me miratimin e fazës së parë të planit, të gjithë pengjet tona do të kthehen në shtëpi”, ka thënë ai në një deklaratë. “Ky është një sukses diplomatik dhe një fitore kombëtare dhe morale për shtetin e Izraelit”.

“Hamasi” ka konfirmuar se është arritur një marrëveshje për t’i dhënë fund luftës, duke thënë se marrëveshja përfshin tërheqjen izraelite nga enklava dhe shkëmbimin pengjesh-të burgosurish.

“Ne pohojmë se sakrificat e popullit tonë nuk do të jenë të kota dhe se do t’i qëndrojmë besnikë premtimit tonë – duke mos hequr kurrë dorë nga të drejtat kombëtare të popullit tonë derisa të arrihet liria, pavarësia dhe vetëvendosja”, thuhet në njoftimin e “Hamasit”.

Autoritetet e Gazës thonë se më shumë se 67 mijë persona janë vrarë dhe pjesa më e madhe e enklavës është rrafshuar qëkur Izraeli filloi kundërpërgjigjen ushtarake ndaj sulmit ndërkufitar të “Hamasit” më 7 tetor 2023. Rreth 1.200 persona u vranë dhe 251 të tjerë u morën peng në Gazë, sipas zyrtarëve izraelitë, me 20 nga 48 pengjet që besohet se janë gjallë. Pavarësisht shpresave të reja për përfundimin e luftës, detaje të rëndësishme ende nuk janë sqaruar, duke përfshirë kohën, një administratë pas luftës për Rripin e Gazës dhe fatin e “Hamasit”.

Faza tjetër e planit të Trumpit kërkon që një organ ndërkombëtar i udhëhequr nga presidenti amerikan dhe që përfshin ish-kryeministrin britanik, Tony Blair, të marrë rol në administratën e pasluftës së Gazës. Vendet arabe që mbështesin planin thonë se plani 20 pikësh duhet të çojë drejt pavarësisë përfundimtare palestineze, gjë që Netanyahu thotë se nuk do ta lejojë kurrë.