Opozita në Podujevë bën akuza ndaj Nexhmi Rudarit dhe Agim Veliut për punësime të familjarëve

Familjarë të ushtruesit të detyrës të kryetarit të Komunës së Podujevës, Nexhmi Rudari, dhe ministrit të Punëve të Brendshme, Agim Veliu, janë punësuar në institucione lokale në Podujevë vitin e fundit, për çka partitë opozitare kanë ngritur shqetësime.

Ndonëse ligjërisht pozita e ushtruesit të detyrës së një shkolle nuk mund të mbahet më gjatë se tre muaj, vëllai i Nexhmi Rudarit, Sabri Rudari, mban këtë pozitë në shkollën fillore “Shaban Shala” në Podujevë që nga dhjetori i vitit të kaluar. Ai është caktuar nga Komuna e Podujevës ushtrues detyre pasi drejtori kishte dalë në pension.

Sabri Rudari, i kontaktuar nga KOHA, ka thënë se ka shërbyer në këtë shkollë qe 31 vjet dhe ka pasur referenca edhe nga drejtori i kaluar. Ka treguar se ka aplikuar edhe në konkursin për drejtor të shkollës, të hapur në korrik.

Komuna e Podujevës e ka konfirmuar se e ka caktuar Rudarin ushtrues detyre dhe se konkursin e ka hapur para tre muajsh, porse ende nuk e ka zgjedhur drejtori i ri.

“Caktimi i ushtruesit të detyrës së drejtorit të shkollës është bërë nga Drejtoria e Arsimit, deri në zgjedhjen e drejtorit me mandat të plotë. Tashmë konkursi është shpallur për drejtor të kësaj shkolle dhe të shkollave të tjera në të cilat drejtorëve u ka skaduar mandati dhe janë duke u zhvilluar procedurat e rekrutimit, konform me ligjin dhe rregulloret në fuqi”, thuhet nga Komuna e Podujevës.

Sabri Rudarit në arsim iu ka punësuar këtë vit edhe vajza, Edita Rudari. Ajo është zgjedhur si zëvendëse e një mësimdhënëseje në shkollën fillore “Ibrahim Rugova”, në konkursin e hapur më 23 korrik, shtatë ditë para se të diplomonte. Edita Rudari në një përgjigje për KOHËN ka thënë se ia ka dalë që ta kompletojë dokumentacionin e duhur për të aplikuar më 6 gusht, një ditë para se të mbyllej konkursi.

Gjatë këtyre muajve në institucionet komunale të Podujevës përmes konkurseve të rregullta janë punësuar edhe Muhamet Jashari, vëllai i gruas së djalit të ministrit të Punëve të Brendshme, Agim Veliu, si dhe Lumturie Mustafa, bashkëshortja e kushëririt të tij. I pari si zyrtar për buxhet dhe financa në QKMF, dhe e dyta si infermiere në këtë qendër. Jashari në një përgjigje për KOHËN ka mohuar çfarëdo ndikimi politik në punësimin e tij, ndërsa Mustafa nuk është përgjigjur në pyetjet e KOHËS.

As Nexhmi Rudari nuk ka kthyer përgjigje, kurse ministri Veliu me t’i dëgjuar pyetjet e ka shkëputur lidhjen telefonike.

Në prag të zgjedhjeve në Komunën e Podujevës dy partitë e tjera politike që janë në garë, Lëvizja Vetëvendosje dhe PDK-ja, kanë drejtuar akuza ndaj partisë në pushtet.

“Këto punësime nuk kanë filluar në muajin dhjetor. Këto punësime janë me logjikën partiake të përjashtimit të qytetarëve për 20 vjet në komunën tonë”, ka thënë kryetari i degës së PDK-së në Podujevë, Naim Fetahu.

Zgjedhjet për kryetar komune në Podujevë do të mbahen më 29 nëntor, dhjetë muaj pas largimit të Agim Veliut nga kjo pozitë, për t’u bërë ministër në nivelin qendror.