Opozita dhe shoqatat e dala nga lufta bojkotojnë seancën solemne të Kuvendit Komunal të Podujevës për 17-vjetorin e Pavarësisë
Podujevë, 17 Shkurt – Kuvendi Komunal i Podujevës ka mbajtur sot seancë solemne me rastin e 17-vjetorit të Pavarësisë së Kosovës. Seanca ka nisur me intonimin e himnit kombëtar dhe atij shtetëror, ndërsa të pranishmit kanë mbajtur një minutë heshtje në nderim të dëshmorëve dhe të rënëve për lirinë e vendit.
Në fjalën e tij, Kryesuesi i Kuvendit Komunal, Hilmi Hoxha, tha se 17 Shkurti është një nga datat më të rëndësishme historike për popullin shqiptar, e arritur përmes sakrificave dhe përpjekjeve të brezave të tërë. Në të njëjtën linjë, edhe Kryetari i Komunës, Shpejtim Bulliqi, theksoi rëndësinë e kësaj dite, duke kujtuar kontributin e Ushtrisë Çlirimtare të Kosovës, dëshmorëve dhe mbështetjen e aleatëve ndërkombëtarë.
Megjithatë, seanca e sotme u karakterizua nga mungesa e përfaqësuesve të opozitës dhe e shoqatave të dala nga lufta, të cilët e bojkotuan këtë aktivitet. Deri më tani, nuk ka një deklaratë zyrtare nga ta për arsyet e këtij bojkoti, por mungesa e tyre është vënë re dukshëm në ceremoninë e organizuar nga institucionet komunale.
Pas seancës solemne, drejtuesit e Komunës, përfshirë Kryetarin Bulliqi, Nënkryetaren Marigona Lahu dhe Kryesuesin Hilmi Hoxha, kanë zhvilluar homazhe te shtatoret e personaliteteve historike në qytet dhe më pas në Kompleksin Memorial të Dëshmorëve në fshatin Penuhë.
Në njoftimin zyrtar të Komunës për këtë aktivitet nuk përmendet bojkoti nga opozita dhe shoqatat e dala nga lufta, por vetëm organizimi i aktiviteteve institucionale.
