OPINION: Udhëheqësit tanë nuk janë tradhëtar, paguhen për me ba punë, e po punojnë keq!

Shkruan: Behram Behluli

Asnjë udhëheqës politik i Kosovës nuk është tradhtar, por kjo nuk do të thotë se ata janë politikan të mirë e të zot, politikan të cilët dinë të udhëheqin shtetin. Ne për këto njëzet vjet kemi pa veprime të tyre të cilat i kanë bërë dëme të mëdha vendit, secili prej tyre në mënyrën e vetë, kjo pa dallim.

Për të parë se cilat janë veprimet e tyre që i kanë bërë dëme vendit, mjafton të numërojmë vetëm disa, instalimi i korrupsionit, mos luftimi i krimit të organizuar, injorimi i mendimit ndryshe, lufta propagandistike ndaj njëri tjetrit, propaganda për gjetjen e tradhtarëve dhe bashkëpunëtorëve të Serbisë, kompromiset e pa nevojshme në bisedime me Serbinë, shkatërrimi i pronës, krijimi i imazhit të keq për vendin, krijimi i kauzave të rrejshme për nevoja elektorale etj.

Këto janë vetëm disa nga veprimet e tyre që i kanë bërë dëme vendit, nëse dikush pyet se për të mirat që i kanë bërë vendit a duhet të vlerësohen, mund të themi se për kohën e paraluftës dhe kohën e luftës, po duhet vlerësuar, kurse për kohën e pas luftës të gjithë këta udhëheqës janë paguar dhe paguhen me pagë nga shteti.

Për ti shërbyer vendit me pagesë, nuk ka mirënjohje, pagesa është shpërblim për punën e kryer, është obligim i tyre respektimi i ligjeve në fuqi dhe shërbimi i mirë, kjo është e tëra!

Udhëheqësit tanë nuk e kuptojnë këtë dhe nuk donë ta kuptojnë, sepse janë, inatgji, të pa dijshëm, janë njerëz të cilët nuk e kanë prioritet zhvillimin e perspektiven e vendit, prioritet për ta është, fyerja e njeri tjetrit, shantazhi, rrena, manipulimi i masave.

Me këto veprime këta dëmtojnë interesat shtetërore për nevoja dhe kauza të veta aspak shtetërore, shoqërore, partiake, por interesa plotësisht PERSONALE!

Pra, udhëheqësit tanë nuk janë tradhtar por dëmtues të mëdhenjë.