OPINION: PDK në pushtet apo në opozitë?!

Shkruan: Behram Behluli

Këto ditë me të madhe po flitet e po shkruhet për mundësinë e përfshirjes se Partisë Demokratike të Kosovës në Qeverinë e Republikës se Kosovës. Këto biseda mund të dëgjohen secilën natë në debatet  televizive, e për këtë po shkruhet edhe në portale të ndryshme.

Tani nga pushteti aktual po joshet partia për të cilën kohë më parë gati të gjithë kishin VIJA TË KUQE, pra për PDK-në, parti e cila tani është opozitë. Unë edhe më parë e edhe në këtë kohë mendojë dhe besojë  se PDK-ja në opozitë do ti ndihmonte edhe vetes e edhe vendit.

Pra, kjo parti duhet të mbetet dhe të bëjë opozitë, opozitë për shtetin e qytetarët e saj. Për të qenë e tillë PDK duhet të punojë për të mirën e vendit, për mirëqenien e qytetarëve të saj. PDK-ja duhet vetë ta kuptojë e pastaj edhe të tjerëve tu bëjë me dije se Kosova  nuk ka kurrfarë nevoje për  koncesus ndër  partiak, për obligimet ndaj shtetit.

Obligimet ndaj shtetit duhet kryer, ato janë të detyrueshme, e nuk ka nevojë me u ulë e me ba muhabet e marrëveshje për me respektu kushtetutën e me i zbatu ligjet në fuqi, s’ka me u goditë në odë e konak për këtë detyrim.

Asnjë marrëveshje në raport me Serbin, PDK-ja nuk duhet ta votojë nëse nuk është në interesin e qytetarëve të vendit, për këtë s’ka kurrfarë nevoje, pra për unitet, për këtë na obligon kushtetuta, nuk ka nevojë kjo të shfrytëzohet si shantazhë e arsyetim për hyrje në qeveri.

Në bisedime s’ka pse shkon opozita, sepse bisedimet duhet ti zhvillojnë përfaqësuesit e institucioneve të cilat janë legale e legjitime, nuk shkohet në bisedime me nipa, mesa e dajë. Ne jemi shtet kemi institucione ku secili duhet ta kryej punën e vetë.

Duhet të kaloj koha e selameve, merrma ketë në delegacion se për ndryshe unë e di çka bëj, ky nuk është mentalitet i njerëzve që e dinë çka është shteti, është mentalitet kur gradat dhe pozicionet janë ndarë ODA-ve. Kjo nuk guxon të ndodhë, ne kemi pasë nevojë për grupe të unitetit kur nuk e kishim shtetin, tani punën duhet ta bëjmë vetëm në bazë te kompetencave e përgjegjësive.

Po roli i opozitës?

Sa i përketë opozitës, ne sot opozitë kemi dy parti të mëdha siç janë VV-ja e PDK-ja.  Mendojë se Kosova fiton shumë, sepse këto dy parti janë parti të fuqishme dhe puna e tyre në opozitë do ta detyrojë qeverinë aktuale të jetë shumë e kujdesshme.

Secila anë ka një interes për ketë, për shembull;  hyrjes së PDK-së në qeveri më së shumti do ti gëzohej Vetëvendosje! Kësaj partie do ti konvenonte më së shumti që PDK të hyjë në qeveri, kjo do ti lironte VV-së hapësirën e zënë në opozitë nga PDK-ja. Fushatën si e vetmja parti opozitare në Kosovë do ta bëjë shumë më lehtë dhe do ta kishte vetëm një adresë për kritikë.

E interesi i PDK-së është apo me mirë me thën duhet të jetë puna e saj për të rifituar pushtetin, e ketë nuk mund ta bëjë duke u futur në një qeveri e cila e ka të vështirë me qeverisë në këto rrethana edhe mund të jete shumë jetë shkurtër.

PDK nuk ka nevojë të ndaj përgjegjësin për keqqeverisje me të tjerët, ashtu siç e mori disa herë me rastin e bashkëqeverisjes. PDK-ja tani ka nevojë të bëjë opozitë teë mirëfilltë dhe në të njëjtën kohë të bëjë luftë politike me VV-në për primat, jo të lëshoj hapësirë, kuptohet luftën politike duhet ta bëj gjithsesi duke respektuar rregullat e lojës.

Ka të tillë në radhët e PDK-së të cilët hyrjen në qeveri e arsyetojnë duke pohuar se me këtë veprim  ndihmohet vendi.

PDK me hyrje në qeveri nuk e ndihmon vendin, PDK në pozitë do të kënaqte ambiciet e disa individëve të cilët janë të interesuar të kenë pushtet.

Këta persona mundohen të na bindin se kjo duhet bërë për hire të të ashtuquajturit unitetit, kjo s’ka të bëj kurrgjë me unitet, kjo është thjeshte lakmi për pushtet.

Ne nuk kemi nevojë për kurrfarë uniteti të cilin na e ofrojnë demagogët sepse shteti ka institucionet, ku të emëruarit në pozita përgjegjëse shtetërore duhet të punojnë dhe mbajnë përgjegjësi, e PDK mund të kontribuoj në parlament, në fund të fundit aty do të përmbyllet gjithçka.

Politikën për vendin duhet bërë pa lajka e trysni, ku qeverisë aktuale vetëm një gjë duhet bërë të ditur se asnjë marrëveshje me Serbinë, PDK nuk do ta votojë nëse nuk është në interesin e qytetareve të vendit, për ketë s’ka kurrfarë nevoje për unitet për këtë na obligon kushtetuta.

A duhet PDK të bëhet pjesë e qeverisë Hoti?!

Për sa i përket hyrjes në qeveri, PDK-ja duhet ta kuptoj se LDK-ja tani ka nevojë për të, Kjo parti tani është dëmtuar shumë, siç po duket në këto rrethana nuk ka fuqi të mjaftueshme me udhëheqë me vendin, e ku tani ne emër të një farë  knonsensi po mundohet të joshë PDK-në, e poashtu me ketë ajo (LDK-ja) po mundohet të amortizojë kërcënimet e AAK-së.

Kurse, NISMA për interesin e vet po mundohet në emër të unitetit të joshë PDK-në për hyrje në Qeveri, kjo parti e ka kuptu se ne zgjedhjet eventuale NISMA më nuk do të ketë fuqi ta kalojë pragun zgjedhor, pra nuk do të jetë parti parlamentare, prandaj është shumë e interesuar qeverisja aktuale te zgjerohet me PDK-në dhe kështu të zgjat kohën e qëndrimit në pushtet.

Të gjitha këto janë kalkulime për interesa të ndryshme partiake e aspak shtetërore, prandaj PDK-ja nuk duhet të bie pre e interesave të  ndryshme të partive tjera politike dhe lakmitareve e tugjarëve të vetë, PDK–së, së pari i duhet reformë e mirëfilltë në radhët e veta, opozitarizëm i fuqishëm gjithnjë në të mirë të vendit, kështu krijohen kushtet për kthim në pushtet.

Për të fituar fuqi politike, rikthimin e besimit në një pjesë të elektoratit i cili deri në zgjedhjet e fundit i besojë PDK-së, atëherë duhet hequr edhe dilemën, se a është PDK-ja përnjëmend opozitë apo as mish as peshk.

Për ketë është koha që lideri i PDK-së edhe një herë të dal para opinionit dhe fuqishëm të konfirmojë se PDK-ja do të jetë opozitë deri sa ti fitojë zgjedhjet.

Kjo do te minonte interesat e të gjitha partive tjera të cilat dëshirojnë ti realizojnë synimet e veta në kurriz të PDK-së, e edhe të atyre që janë brenda PDK-së, vetëm për një arsye, marrjen e pozicioneve dhe ruajtjen e privilegjeve të krijuara për shumë kohë.