OPINION: Dini i duhet Podujevës

I gjithë ndryshimi i madh në Amerikë fillon në tryezën e darkës, thoshte Presidenti amerikan Ronald Reagan.

E fillova këtë shkrim me këtë thënie të Reganit për të treguar se edhe ne si shoqëri shumicën e vendimeve i marrim kur ulemi në tryezën e darkës. E besoje se një vendim shumë me rëndësi për jetën tonë e kemi para vetes. Si qytetar të Podujevës kemi përgjegjësi për gjeneratat që do të vijnë për vendimet që do t’i marrim. E kam fjalën për zgjedhjet lokale qe mbahen me 22 tetor. Ka mbi 17 vite që Podujeva qeveriset nga një parti politike konkretisht nga një person. Për 17 vite kemi pas shume pritje pasi edhe kemi pas shumë premtime për ta bërë Podujevën një qytet evropian, po po evropian po them. A ndodhi një gjë e tillë pyetje të cilën të gjithë ja bëjmë vetes. Jo nuk ka ndodh. Është e rënd ta them por Podujeva ka stagnuar në çdo sferë të jetës.

Kryetari Agim Veliu e ka monopolizuar çdo gjë në komunën. Për 4 mandate ka bërë veprime që nuk i kanë hije një kryetari që i jepet e drejta me votë për ta qeverisur komunën. Pse them kështu? Jo se kam ndonjë inat personal, por se raportet e organizatave te ndryshme të shoqërisë civile por edhe media kanë raportuar se Agim Veliu ka qeverisur keq me komunën. Kur them keq dmth ka pas edhe korrupsion, ka pasur punësime pa konkurse, diskriminim të të rinjve me kualifikime te larta, me një fjalë ua ka humbur shpresën për të jetuar në këtë qytet. Prandaj duhet ndryshim.

Paramendojeni Presidentin Bill Clinton ose Barack Obama, sikur mos te kishte pasur një rregull se me shumë se dy mandate nuk mund të qeverisesh, ata te dy sot ende do te ishin ne pushtet. Po edhe sikur te kishte punuar Agim Veliu shumë dhe ta bënte Podujevën qytet te zhvilluar ekonomikisht prapë qytetarët do të duhej te votonin per ndryshime. Prandaj e thash se ne tryezen e darkës na pret nje vendim i rëndësishëm si familje.

Kë ta votojmë? Stagnimin, keqqeverisjen apo ta provojmë ndryshimin. Garës për te parin e Podujevës i janë futur disa kandidat, por 4 prej tyre janë në listën e ngushtë. Mirëpo duke e njohur për së afërmi mendojë se Podujeva duhet t’i jap besimin për 4 vite Hajredin Hysenit – Dini.

Nuk kam dyshime se edhe Ajet Potera si dhe Fatmir Humolli kanë qëllim zhvillimin e Podujevës, por projekti i Dinit është pikërisht ai që po e kërkojnë qytetarët e kësaj komune. Kthimin e dinjitetit.

Podujeva dha shumë për Kosovën kurse mbeti për vete e varfër, mbeti e pazhvilluar sepse kuadrot i ikën këtij qyteti, kuadrot ja mori Prishtina. U deshën 17 vite që të vijë një gjeneratë e re e intelektualeve të rinj të cilët kanë vendosur që mos ta lënë më Podujevën në duar të pasigurta, në duar të njerëzve që nuk dinë të qeverisin. Pra ata duan ta marrin fatin e tyre në duar të tyre.

Këtij projekti i prin  kandidati për kryetar Hajredin Hyseni. Dini dha shumë për Podujevën dhe jo vetëm. U dha vet jetën por Zoti deshi ta kemi të gjallë, pas vitesh të tëra përndjekje dhe vuajtje të në burgjet e sistemit famëkeq serb. Vëllaun dëshmor ja fali atdheut e lirisë dhe prapë sot dëshiron ta marr besimin e juaj qytetarë të Podujevës që të qeverisë me komunën tonë, që ta kthejmë në qytet ku rinia ndihet krenare në një qytet ku gjendja në arsim e shëndetësi do të jetë shembull për komunat tjera. Për gjeneratat ë reja dua të ju tregojë se Hajredin Hyseni – Dini: Gjatë viteve ‘80 dhe ’90 ka qenë pjesë aktive e lëvizjeve ilegale për çlirimin e Kosovës. Për angazhimin e tij politik dhe kombëtar është burgosur dy herë. Herën e parë në vitin 1988, ku dënohet me 5 vjet burgim dhe herën e dytë në vitin 1993, që dënohet me 10 vjet burgim. Pas lirimit nga burgu, në vitin 2001, u angazhua aktivisht në jetën politike dhe institucionale në Kosovë.

Pra Dini: Di, do dhe ja del që ëndrrën tonë të kamotshme ta bëjmë realitet. Dhe krejt në fund i ftojë edhe liderët e partive tjera opozitare si Ajet Poteren dhe Fatmir Humollin ta përkrahin Dinin sikur atëherë kur e përkrahën në çlirimin e Kosovës. Tani është koha të bëhemi bashkë për ta ndryshuar gjendjen nga keqqeverisja në dhe komunën ta vëmë në shërbim të interesave qytetare lokale.

Pra, merrni vendimin e rëndësishëm votoni për ndryshime ne Podujevë siç e bënë edhe komunat tjera të Kosovës. Jepini besimin Dinit.

Autor: Besart Rexhepi