Operacioni policor në Podujevë: Policia sekuestroi rreth 2 kg drogë dhe municion

Policia e Kosovës ka zhvilluar një aksion policor, të dielën në mbrëmje në Podujevë, që rezultoi me sekuestrimin e rreth 2 kg marihuanë. Përveç drogës, u kap edhe municion, raporton Gazeta Sinjali.

Nga Policia Rajonale në Prishtinë kanë bërë me dije se bastisja është kryer në pronën e personit të dyshuar, i cili akoma nuk është kapur.

Në shtëpinë dhe objektet përcjellëse të tij, janë gjetur dhe sekuestruar 1.994 kg. substancë e dyshuar narkotike e llojit marihuanë, 75 fishekë kalibrash të ndryshëm, 7 peshore të ndryshme, mbështjellës të ndryshëm për të substancave narkotike dhe një radio-lidhje.

Zëdhënësja Flora Ahmeti ka njoftuar se lidhur me rastin në cilësi të dëshmitarëve janë intervistuar dy persona.

“Rasti është hap, është në fazën fillestare të hetimit. Për detaje njoftoheni me kohë” – tha ajo për Sinjalin.