O’Connell: BE ka punuar shumë për lëvizjen e lirë, muri nuk ndihmon asgjë

Shumë qytetarë e kanë pyetur ambasadorin për çështjen e liberalizimit të vizave për kosovarët. Shumë të tjerë kanë folur për drejtësinë në Kosovë, por edhe për marrëdhëniet me Britaninë, shkruan Gazeta Express.

Disa qytetarë e kanë pyetur edhe për murin në Veri të Mitrovicës, ku ambasadori ka thënë se BE’ja ka punuar me vite të tëra me të dyja palët, serbët dhe kosovarët, për qëllimin e ndërtimit të lëvizjes së lirë.

“Nuk mendoj se ndërtimi i një muri ndihmon. Por, gjithashtu mendoj se integrimi i Kosovës varet nga shumë faktorë të tjerë se sa a është ndërtuar një mur apo jo”, ka thënë ambasadori britanik.

Në një pyetje tjetër të një qytetari, se a mundet Kosova të krijojë marrëdhënie me Kommonwealth si një alternativë për integrim në Bashkimin Europian, ambasadori ka thënë se nuk është me rëndësi që të jemi anëtar të Kommonwealth, pasi ai ka thënë se me Kosovën janë ndërtuar marrëdhënie të veçanta, “të ndërtuara në luftë dhe të përforcuara në paqe”, duke shtuar se është në interes së Britanisë së Madhe ndërtimi i i marrëdhënieve të mira me Kosovën, shkruan Express.

“Si është e mundur që Kosova ende nuk ka liberalizim të vizave me më pak se dy milionë banorë, flitet shumë se përpos korrupsionit është problemi edhe të demarkacioni”, ka pyetur një qytetar, duke shtuar se Ukraina dhe Turqia gjithashtu kishin probleme të mëdha, por edhe kishin numër shumë të madh të banorëve, mirëpo ato janë afër liberalizimit.

Ambasadori O’Connell për këtë ka thënë se Mbretëria e Bashkuar nuk është pjesë e shteteve të Shengenit. “Ne lëshojmë viza për Britani dhe i trajtojmë të gjitha shtetet e rajonit njësoj”, është përgjigjur ambasadori.