Objekti i dedikuar për shërbime specialistike në Podujevë, jashtë funksionit

Qytetarë të Podujevës ende nuk po marrin shërbime në ambulancën specialistike, objekti i ndërtuar i së cilës mbetet jashtë funksionit. Godina ishte kundërshtuar nga qeverisja aktuale në këtë Komunë, shkaku i ndërtimit afër një shkolle. Teksa në Komunë u zotuan se së shpejti do të nisë ofrimi i disa prej shërbimeve shëndetësore specialistike, në Ministrinë e Shëndetësisë dhe në Shërbimin Spitalor Klinik e Universitar nuk iu përgjigjën pyetjeve të KOHËS lidhur me çështjen

Objekti në të cilin synohet që të ofrohen shërbime specialistike për pacientët në Podujevë mbetet jashtë funksionit.

I ngritur në kohën e qeverisjes së mëhershme, i paraparë për Emergjencë, objekti është kundërshtuar nga qeverisja aktuale, shkaku i ndërtimit afër një shkolle.

Kundër tij janë shprehur edhe përfaqësuesit e shkollës.

E zyrtarët e Komunës në Podujevë kanë thënë se për funksionalizimin e tij, përgjegjësia tani është te Ministria e Shëndetësisë dhe te Shërbimi Spitalor Klinik dhe Universitar.

“Objekti tashmë pothuajse është gati, edhe inventari i brendshëm dhe presim që shumë shpejt ai objekt edhe siç janë kontakt me Ministrinë e Shëndetësisë presim që shumë shpejt Komuna e Podujevës do t’i ketë edhe shërbimet specialistike dhe qytetarët e Komunës sonë të marrin shërbime të ndryshme”, ka thënë zëdhënësi në Komunën e Podujevës, Fatri Zhitia.

Më 2020, Shërbimi Spitalor Klinik Universitar i Kosovës (SHSKUK) pati shpallur konkurs për angazhimin e 17 specialistëve të dedikuar për Spitalin e Podujevës. Ata janë pranuar e në mungesë të funksionalizimit të objektit, zëdhënësi Zhitia ka thënë se specialistët janë duke e zhvilluar punën në Qendrën Klinike Universitare të Kosovës (QKUK).

“Gjithsej kanë qenë 17 mjekë të cilët janë pranuar në kuadër të atij konkursi. Por, ndoshta 17 nuk kanë me qenë në shërbime specialistike këtu që do të ofrojnë, për shkak se ka edhe specifikat e tjera edhe stafi mbështetës në disa prej shërbimeve që ofrohen shëndetësore, por disa prej tyre do të fillojnë edhe të japin shërbime në objektin e dedikuar për shërbime specialistike”, ka deklaruar Zhitia.

Zyrtarë të Komunës nuk kanë treguar se cilat shërbime do të ofrohen fillimisht në këtë ambulancë. Godina gjatë muajit shkurt është vizituar edhe nga ministri i Shëndetësisë, Arben Vitia, i cili pati theksuar se topi për objektin tash është tek institucioni që ai e drejton.

KOHA u ka adresuar pyetje Ministrisë së Shëndetësisë dhe SHSKUK-së, porse nuk ka pranuar përgjigje nga asnjë dikaster.

“Pyetjet e tuaja janë adresuar në SHSKUK për përgjigje dhe jemi duke pritur përgjigje nga ana e tyre, momentin që i pranojmë këto përgjigje, menjëherë do t’i ndajmë me ju”, thuhet në përgjigjen e MSH-së. KOHA net/N.Toverlani