Nxënësit në të ftohtë pa ngrohje në ‘Naim Frashëri’ të Podujevës – prindërit alarmojnë, drejtori pranon problemin

Sot në Podujevë kanë rënë reshje të mëdha bore dhe temperaturat kanë qenë shumë të ulëta, mirëpo në shkollën fillore “Naim Frashëri” nxënësit janë përballur me mungesë të ngrohjes.

Prindi  ka reaguar publikisht duke thënë se fëmijët e tij janë detyruar të largohen nga mësimi për shkak të të ftohtit:

“Sot në shkollën Naim Frashëri – Podujevë nuk ka pasur nxemje, u desh të lëshohen fëmijët nga ora sepse ishte shumë ftohtë. Këto janë të vërteta dhe jo gënjeshtra, marre është të punohet kështu. Në mungesë të ngrohjes, orët e mësimit duhet të reduktohen.” – shkroi ai.

Ndërkaq, drejtori i shkollës Tafil Thaçi, e ka pranuar se ngrohja ka munguar, por ka mohuar pretendimin se nxënësit janë liruar nga mësimi:

“Është e vërtetë se sot nuk ka pasur nxemje në shkollë, por nxënësit nuk i kemi liruar, siç po thoni ju.” – ka deklaruar Thaçi.

Ky problem ka shkaktuar shqetësim tek prindërit, të cilët kërkojnë që institucionet komunale të ndërhyjnë urgjentisht, në mënyrë që nxënësit të mos mbeten në kushte të papërshtatshme për zhvillimin e procesit mësimor.