Nxënësi 16-vjeçar ther me thikë bashkëmoshatarin, i mituri dërgohet në spital

Konfliktet mes të rinjve jo rrallëherë kalojnë në përleshje fizike, për çka nevojitet edhe ndërhyrja e Policisë. Motivet shpesh dalin të jenë banale dhe lidhen me probleme për të cilat ata nuk arrijnë të merren vesh dhe për pasojë futen në sherr. Një rast i tillë ka ndodhur dje afër shkollave të mesme në Gjilan, ku mbeti i therur me thikë një nxënës, raporton Gazeta Sinjali.

Këtë herë në rast janë përfshirë dy të mitur, që dyshohet se u kapën për motive akoma të panjohura, me ç’rast përleshja eskaloi deri në përdorimin e thikës.

Burimet nga Emergjenca kanë bërë me dije se viktima është dërguar në gjendje në spital dhe sipas informacioneve të para ndodhet jashtë rrezikut për jetën.

Në anën tjetër, i dyshuari 16-vjeçar, është arrestuar nga Policia, teksa thika që dyshohet se e ka përdorur është sekuestruar nga zyrtarët policorë që intervenuan në vendin e ngjarjes.

I dyshuari është shoqëruar në stacion policor për intervistim, ku ka dhënë deklaratën e tij në lidhje me rastin.

Pas përfundimit të procedurave policore, Prokurori i Shtetit ka urdhëruar që ndaj tij të caktohet masa e ndalimit për 24 orë për veprën penale “Lëndim i lehtë trupor”.