Nuk ndryshon mënyra e votimit për mërgimtarët (Video)

Ndonëse në listat e votimit 1/3 e votuesve jetojnë në diasporë, pak prej tyre e shfrytëzojnë këtë të drejtë. Kjo për shkak të procedurave të komplikuara.

Njohës të çështjeve politike kritikojnë partitë, duke thënë që diasporën gjithmonë vetëm e kanë shfrytëzuar, raporton KTV.

“Kjo është çështje e subjekteve politike të cilat nuk e konsiderojnë të rëndësishme që të takohen me ta, edhe subjekte të tjera politike kanë degë në vendet e Europës”, tha Valmir Ismaili nga Democracy Plus, duke shtuar se më së miri do të ishte që të organizohet votim për mërgimtarët nëpër ambasadat e Kosovës nëpër diasporë.

Për partinë, e cila ka bërë më së shumti fushatë në diasporë, Lëvizjen Vetëvendosje, votimi i bashkatdhetarëve është i rëndësishëm, por, sipas saj, në aspektin organizativ, Kosova ia ka pamundësuar kësaj kategorie marrjen pjesë në votim.

Edhe zyrtarë të Nismës për Kosovën shpresojnë që Qeveria në ardhje, të bëjë më shumë në lidhje me këtë.

E për PDK-në, është e rëndësishme që diaspora të jetë pjesë e vendimmarrjes.

Në Ministrinë e Diasporës thonë se koha e shkurtër e organizimit të zgjedhjeve të parakohshme, e që mbahen në qershor, ka pamundësuar që të bëhet diçka në lidhje me këtë.