Nuk ndalet Vetëvendosje: I jep edhe një goditje Agim Veliut

Nenkryetarja e VV-së, Arberie Nagavci me anë të një shkrimi në Facebook ka deklaruar se Veliu ka shkelur Ligjin duke bërë publik faktin se një pjesë e Kabinetit qeveritar ka bërë analizat në lidhje me Koronavirusin.

“Me këtë deklaratë, ish ministri i brendshëm ka shkelur Ligjin për Mbrojtjen e të dhënave personale, dhe nenin 20, të Ligjit Nr.2004/38 për të Drejtat dhe Përgjegjësitë e Qytetarëve në Kujdesin Shëndetësor, “E drejta e ruajtjes së konfidencialitetit dhe aspektit privat të të dhënave shëndetësore”, e mbi të gjitha ka cenuar nenin 36 [E Drejta e Privatësisë], dhe nenin Neni 41 [E Drejta e Qasjes në Dokumente Publike] të Kushtetutës së vendit” shkruan Nagavci në Facebook raporton Gazeta Blic.

Postimi i plotë:

Zot. Agim Veliu, ish ministri i brendshëm paska deklaruar:

“E kam një informacion që Albini dhe disa prej pjesëtarëve të tij në Qeveri dhe në Kuvend, duke filluar nga nënkryetarja e Kuvendit i kanë kryer analizat ku iu janë marrë mostrat se a janë me koronavirus apo jo”.

Me këtë deklaratë, ish ministri i brendshëm ka shkelur Ligjin për Mbrojtjen e të dhënave personale, dhe nenin 20, të Ligjit Nr.2004/38 për të Drejtat dhe Përgjegjësitë e Qytetarëve në Kujdesin Shëndetësor, “E drejta e ruajtjes së konfidencialitetit dhe aspektit privat të të dhënave shëndetësore”, e mbi të gjitha ka cenuar nenin 36 [E Drejta e Privatësisë], dhe nenin Neni 41 [E Drejta e Qasjes në Dokumente Publike] të Kushtetutës së vendit.

Është interes i qytetarëve që të dinë për gjendjen shëndetësore të personave publik me përgjegjësi shtetërore dhe të udhëheqësve të tyre, por jo pa pëlqimin e bartësve të të dhënave.

Duke qenë në kontakte të shumta me qytetarë është përgjegjësi e jona të kujdesemi për shëndetin publik, të sigurohemi për veten dhe të tjerët, të respektojmë plotësisht Vendimet e Qeverisë dhe institucioneve dhe të jemi të përgjegjegjshëm në veprimet dhe sjelljet tona.

Zot. Veliu me deklaratën e tij, nuk ka zbuluar asgjë të re sepse analizat i kemi bërë një pjesë e madhe e zyrtarëve dhe kabinetit në Kuvend, ashtu si dhe jemi kujdesur që të dezinfektohen hapësirat e Kuvendit dhe të krijohen kushtet për punë.

Ajo çfarë ka bërë në fakt Zot. Veliu është konfirmimi i arsyeshmërisë së Vendimit të Kryeministrit për shkarkimin e tij, sepse mbrojtja e të dhënave personale të qytetarëve është obligim ligjor dhe e drejtë e njeriut, e ky ish ministër e shkel edhe këtë obligim bazik.

Pa panik, por me kujdes të shtuar.