Nuk është e lehtë të bësh Qeveri: Lista Serbe kërkon 2 ministri, egjiptianët 1, po turqit e boshnjakët?

Kryetari i Vetëvendosjës, Albin Kurti sot ka pasur një agjendë shumë të ngjeshur. Në një përpjekje për të bërë Qeverinë, ai ende nuk ka marrëveshje me LDK-në, por ka bërë tenativa të tjera.

Një nga to ishte diçka që ai e kishte sulmuar fort dhe e kishte quajtur edhe çetnike, Listën Serbe. Madje kishte thënë se edhe nuk do të ketë koalicion me ta, por duket se e kuptoi se pa ta nuk mundët.

Përveç që u përball me ta, duke shkelur ato çka kishte folur e premtuar, ai u përball edhe me kërkesat që ndoshta nuk i ka pritur, dhe duket vështirë të realizueshme.

Nga Lista Serbe, pas takimit me Kurtin kanë bërë me dije se duan 2 ministri. Kurti kishte shpresuar që në kuadër të 12 ministrive t’ua jap vetëm 1 ministri serbëve, shkruan Reporteri.net

“Sapo ka përfunduar takimi me Albin Kurtin, takim ky që është dashur të zhvillohet shumë më herët. Megjithatë ne sot ia kemi shprehur qëndrimin tonë se presim nga partitë shqiptare formimin e Qeverisë. Ajo që dua ta them se siç është e qartë për bashkësinë ndërkombëtare dhe atë të Kosovës se pa Listën Serbe nuk mund të bëhet themelimi i Qeverisë. Qeveria duhet ta ketë një përfaqësues serb”, është shprehur ndër të tjera Goran Rakiq nga Lista Serbe.

“Atë që e kemi sqaruar është se nëse Qeveria ka më shumë se 12 ministri, një do t’u takojë përfaqësuesve të komuniteteve, me gjasë Listës Serbe pasi ne kemi 11 përfaqësues. Përsëris formimi i Qeverisë dhe hapat e ardhshëm janë në dorë të dy partive fituese”, është shprehur Rakiq.

E me kërkesa për ministri u përballë edhe nga minoritetet jo serbe. Deputeti Veton Berisha paraqiti synimet e tyre, pas takimit me Kurtin.

“Qëllimi i takimit është koordinimi dhe kërkesa e tij për të mbështetur qeverinë në ardhje. Përcaktimi jonë është ende i padefinuar. Kërkesa jonë ka qenë ta kemi një përfaqësim që komunitetet të jenë më aktiv në vendimmarrje sidomos komuniteti egjiptian. U diskutua gjatë por mbetet që ne të mbledhim kryesitë tona dhe të vendosim. Ka qenë kërkesë që të drejtojmë ministri dhe të dëshmojë se jemi të zotë të drejtojmë ministri. Kërkesa ka qenë të drejtojmë një ministri dhe kemi kërkuar që ky standard të ndryshojë. Mbetet me u vendosë nga zoti Kurti”, është shprehur ai, shkruan Reporteri.

Në këtë rast janë edhe turqit dhe boshnjakët që mund të kërkojnë ministri. Në një variant të tillë, atëherë ose duhen anashkaluar kërkesat e tyre, ose duhet rritur numri i minisrtive.

Nga LDK-ja ndërkaq, Kurtit po i kërkohen 5 ministri, postin e Kryetarit të Kuvendit për një vit dhe postin e Presidentit. Kurti po refuzon tash ta shakrkojë Glauk Konjufcën si Kryetar Kuvendi dhe po refuzon që blanko ta japë presidentin për LDK-në.

Ai sot kërkoi seancë për votimin e Qeverisë, e cila do të mbahet të hënën, pikërisht në ditën e fundit kur edhe skadon afati i tij si mandatar. Kjo lëvizje e tij thuhet se është bërë pa marrëveshje me LDK-në. /Reporteri.net