Një person e sulmon fizikisht 19-vjeçaren, gjatë arrestimit i gjenden thikë e drogë në xhepa

Vajzat dhe gratë po vazhdojnë të jenë viktimat më të shpeshta të dhunës që përjetojnë qoftë nga bashkëshortët apo partnerët e tyre. Kjo dukuri shqetësuese ka marrë përmasa të mëdha kohëve të fundit, raporton Gazeta Sinjali.

Me një situatë të tillë është përballur një vajzë 19-vjeçare në qytetin e Gjilanit, e cila mbrëmë pas mesnate ka raportuar në Polici se ka qenë viktimë e sulmit fizik.

Burimet e Gazetës Sinjali kanë bërë me dije se njësitë policore kanë arritur që ta arrestojnë të dyshuarin, të cilit gjatë kontrollit trupor i është gjetur substancë e dyshuar narkotike dhe një thikë.

Me urdhër të prokurorit, i dyshuari është dërguar në mbajtje si i dyshuar për tri veprat penale ‘Sulm’, ‘Mbajtje në pronësi, kontroll ose posedim të paautorizuar të armës’ dhe ‘Posedim i paautorizuar i narkotikëve, substancave psikotrope ose analoge’.