Një muaj paraburgim burrit nga Podujeva që vrau familjaren nga pakujdesia

Gjykata Themelore në Prishtinë i ka caktuar masën e paraburgimit prej një muaji të pandehurit M.Zh. nën dyshimin se ka kryer veprën penale “Vrasje nga pakujdesia” të një anëtareje të familjes.

Sipas njoftimit nga Themelorja, i pandehuri më 20 dhjetor në Podujevë, nga pakujdesia kishte shkrepur armën e markës “Magnum” dhe në atë moment kishte pësuar lëndime anëtarja e familjes, Sh.Zh. që një ditë më pas vdiq në Qendrën Klinike Universitare të Kosovës si pasojë e plagëve të marra.

Gjykata ka vlerësuar se masa e paraburgimit është adekuate për të zhvilluar pa pengesa këtë rast, duke u shprehur se ekzistojnë rrethanat që tregojnë rrezikun se i pandehuri mund të ikë, apo të ndryshojë provat.