Nis Lufta VV-PSD: Kurti deponon dosje në Polici për Shpend Ahmetin

Vetëvendosje i deponon Shpend Ahmetit dosje në Polici, për keqpërdorim të detyrës zyrtare dhe konflikt interesi, transmeton gazetametro.net.

Lëvizja Vetëvendosje ka dorëzuar sot gjatë ditës në Policinë e Kosovës informata për ish-bashkëpartiakun e tyre Shpend Ahmeti.

Partia e të cilës ishte pjesë deri vonë Ahmeti, po e akuzon këtë të fundit për keqpërdorim të detyrës zyrtare dhe konflikt interesi, pasi që përmes një vendimi i ka ndarë 60 mijë euro për festivalin “Sunny Hill”.

Siç thuhet në njoftimin e Vetëvendosjes, këtë vendim për ndarje të mjeteve, kryetari Ahmeti e ka arsyetuar me pagesën e këngëtarit me origjinë shqiptare, Action Bronson.

“Kohëve të fundit, kryetari ka filluar që paranë e qytetarëve të Prishtinës, ta shpërndajë si t’i teket. Kujtojmë se kjo përveçse është e pandershme, në këtë rast, përbën edhe shkelje të rëndë të konfliktit të interesit nga kryetari i Komunës së Prishtinës, i cili është edhe vetë anëtarë bordi në festivalin ‘Sunny Hill’. Pavarësisht se ai mund të deklaroj tani ndryshe, ka deklarata publike dhe gjithashtu edhe ueb faqja e OJQ-së ku janë derdhur këto mjete e ka vërtetuar këtë.”, thuhet në komunikatën e Lëvizjes Vetëvendosje.

Biletat për koncertin e “Sunny Hill” janë shitur në treg me vlerë prej 35 euro deri në 75 euro./Gazetametro.net