Ngjarja që kishte tronditur Podujevën e vitit 1983 (Video)

Një ngjarje e rëndë kishte ndodhur në Podujevën e vitit 1983

Dasma ishte kthyer në mort, e hakmarrja e motivet banale kishin treguar kthetrat edhe një herë.

Zeqir e Adem Zeqiri nga Halabaku do të përgjigjeshin për veprën penale vrasje e dyfishtë –privimit nga jeta të Azemine Rafunës, bashkëfshatares së tyre, e cila në çastin e kobshëm u vra, e veshur me rrobat e duvakun e nusërisë.

Bashkë me të, u vra dhe drejtuesi i automjetit të nuses, Enver Hyseni, e u plagos një tjetër.

Në ditën e kobshme, më 5 qershor të vitit 1983, rreth orës 16 e 15 minuta, Azemine Rafuna duhej të shkonte nuse në Batllavë, të martohej për Zymber Hysenin. Meqë për këtë haber Adem Zeqiri (ish-burri i Azemines), me të cilin në 28 nëntor të vitit 1982, kishte ndenjur vetëm natën e parë të dhëndërrisë, e që pastaj e kishte dëbuar nga shtëpia e tij) merr vesh se dasmorët do të kalonin afër shtëpisë së tij e i shtyrë nga motivet e xhelozisë se nusja e tij e mëparshme do të martohej përsëri, në marrëveshje me vëllanë e vet, Zeqirin, vendosin që në rastin kur të kthehet kolona e automjeteve, përkatësisht vetura në të cilën ndodhet nusja, t’u dalin në pritë dasmorëve dhe të vrasin nusen dhe çdokënd tjetër që do të kundërshtonte.

Dorasit kishin zënë pozitat me të ardhur të krushqive.

Nusja u vra nga Zeqiri.

E goditur në shpinë, në pjesën e nën krahut të djathtë të brinjëve, ku nga veprimi dinamik i plumbi shqyen mëlçinë, shpretkën, zorrën dymbëdhjetë gishtore dhe lukthin e pas pak kohe vdes.

I tronditur nga kjo situatë e tmerrshme se iu vra nusja në automjetin e tij, Enveri e ndal veturën dhe del nga ajo. Vërsulet rrëmbyeshëm në dorasin Zeqir, me qëllim që të mos e lejojë të shtie në ndokënd nga dasmorët. Enveri vdes në vendin e kryerjes së krimit.

Pas kësaj tragjedie dorasit u tërhoqën dhe zunë pozitat duke u barrikaduar afër oborrit të tyre kërcënuan se do të vrasin çdonjërin që hyn në oborr.

Njëmbëdhjetë dëshmitarë do t’i paraqisnin deklaratat e tyre për këtë rast, e gjykimi do të zgjaste dy ditë.