Nga sot pritet të mbyllen të gjitha pishinat e hapura në Kosovë

Njëra nga vendimet e Qeverisë për masat e reja pritet të jetë edhe mbyllja e pishinave të hapura, ndërsa do të lejohet funksionimi i fitneseve dhe pishinave të mbyllura.

Gazeta Sinjali mëson se në mesin e vendimeve të Qeverisë që pritet të hyjnë në fuqi sot do të lejohen të funksionojnë vetëm fitneset, pishinat e mbyllura dhe sportet individuale.

“Lejohen vetëm fitneset, pishinat e mbyllura dhe sportet individuale, në përputhje me Manualin për mbrojtjen nga përhapja e COVID-19”, thuhet në propozim-vendim.

Qeveria e Kosovës në fillim të muajit korrik kishte marrë vendim që të pezullohen aktivitetet në hapsira të mbyllura, duke përfshirë fitneset dhe pishinat.

Funksionimi i tyre ishte lejuar vetëm në ambiente të hapura, duke i respektuar në kushtet e parapara në Manualin për mbrojtje nga COVID-19.

“Pezullohen aktivitetet rekreative, kulturore dhe sportive të mbyllura në të gjithë territorin e Republikës së Kosovës (përfshirë fitneset, pishinat, shkollat e futbollit dhe sportet tjera, trajnimet e kësaj lëmie etj). Të gjitha aktivitetet e lartcekura që zhvillohen në ambiente të hapura detyrohen të zbatojnë në përpikëri kushtet e parapara në Manualin për mbrojte nga COVID-19”, thuhej në vendimin e 13 korrikut të Qeverisë së Kosovës

Rreth masave të reja që priten të hyjnë në fuqi sot, anëtarët e kabinetit qeveritar aktualisht janë duke votuar në mënyrë elektronike.