Nga 1450 maturantë në vitin 2020, Testin e Maturës nuk e kanë kaluar 614 në Podujevë

Të pakënaqur janë shprehur këshilltarët komunalë të Podujevës me rezultatin e nxënësve të kësaj komune gjatë vitit 2020. Gati gjysma e maturantëve në këtë komunë kanë “ngelur” në Testin e Maturës, ndërkohë që mirë nuk kanë dalë as në përfundimin e gjysmëvjetorit të parë në vitin shkollor 2020/2021.

Sipas një informate të Drejtorisë së Arsimit të paraqitur në mbledhjen e fundit të Kuvendit Komunal shihet që suksesi i nxënësve nga 1-5 në gjysmëvjetorin e parë është 4.32, për klasat 6-9 3.49 ndërsa për nxënësit e shkollave të mesme: Gjimnazi “Aleksandër Xhuvani 3.51, Shkolla Ekonomike “Isa Boletini” 2.54 dhe Shkolla Teknike “Fan S. Noli” 2.14. Duke e komentuar këtë informatë, këshilltari i partisë në pushtet Vetëvendosje, Ragip Fetahu, e ka konsideruar shqetësues rezultatin e maturantëve.

“Nga 1450 maturantë (2020 v.j.), Testin e Maturës nuk e kanë kaluar 614 apo rreth 43%. Ndërsa në afatin e dytë nga 603 nxënës testin e kanë kaluar vetëm 57. 22 %. Po t’i analizojmë rezultatet e dy afateve të testit të maturës, rezulton se komuna jonë është rreth 9% nën nivelin nacional. Këto janë rezultate jo të mira, që kërkojnë një analizë të brendshme për të përmirësuar këtë rezultat”, është shprehur Fetahu.

Por, këto kritika nuk i ka adresuar në pushtetin e tanishëm të Podujevës, që ka marrë detyrën në muajin dhjetor të vitit të kaluar. Këshilltari i Vetëvendosjes ka thënë se problemet në arsim janë të akumuluara ndër vite gjatë periudhave të ndryshme kohore si rezultat i shumë faktorëve. Ai ka thënë po ashtu se problem tjetër i Podujevës është largimi i nxënësve në qytete të tjera.

Edhe këshilltari nga radhët e PDK-së, Pajtim Hodolli, ka folur për rezultatin jo të mirë të maturantëve.