Nesër mblidhet Qeveria, a do të procedohet Demarkacioni?

Përfaqësuesit e koalicionit qeverisës tash e një kohë janë duke thënë se procedimi i Marrëveshjes për Demarkacionin e Kufirit me Malin e Zi do të ndodhë gjatë kësaj jave. Ndërkohë, nesër nga ora 9 Qeveria e Kosovës do të mbaj një mbledhje, por ende nuk dihet nëse në këtë mbledhje  do të vendoset që Demarkacioni të procedohet në Kuvend.

Lajmi.net sot ka provuar të flas me Faton Abdullahun, këshilltarin e kryeministrit për media, Bajram Gecajn këshilltar i kryeministrit, me shefin e kabinetit, Sokol Havollin dhe zëdhënësin e Qeverisë Arban Abrashi, por asnjëri nga ta nuk ka pranuar të flas.

Kujtojmë se ndihmës sekretari i SHBA-ve, Hoyt Brian Yee gjatë një bisede në telefon me kryeministrin, Isa Mustafa dhe kryeparlamentarin, Kadri Veseli ka kërkuar që çështja e demarkacionit të përfundohet sa më shpejt.

Poashtu, zyrtarët e PDK-së në vazhdimësi janë duke kërkuar që Marrëveshja e Vjenës të procedohet në Kuvend, por Mustafa thotë se ajo nuk do të procedohet pa u siguruar 80 votat e nevojshme për ratifikim.

Mbetët të shihet nëse në mbledhjen e nesërme të ekzekutivit do të ketë ndonjë vendim për këtë çështje. /Lajmi.net/