Nëse nuk arrihet koalicioni LDK-VV, ky është “plani B” i Isa Mustafës

Kryetari i Lidhjes Demokratike të Kosovës (LDK), Isa Mustafa ka treguar se çfarë do të ndodhë nëse nuk do të arrij një koalicion me VV-në.

Mustafa tha se LDK-ja nuk ka një plan B, ose bën koalicion me VV-në ose kthehet në opozitë dhe nuk bashkëpunon me asnjë parti tjetër.

“Ne i kemi thënë VV se plani B i LDK është të shkojmë në opozitën, nëse bëjmë qeverinë me VV e bëjmë, nuk pranojmë asnjë mandat tjetër nga presidenti dhe bashkëpunim me parti tjera, nuk ka plane tjera, plani tjetër është i fundit themi që nuk u morëm vesh dhe shkuam në opozitë, shpresoj se kemi hapësirë që të mos vij tek ajo por të gjejmë gjuhë të përbashkët që ta bëjmë qeverinë sa më parë”, tha ai.

Mustafa, është shprehur këmbëngulës se çështja e postit të Presidentit duhet të diskutohet edhe tani.

Ai ka thënë se pret që koalicioni të ndodhë para datës së seancës konstituive në mënyrë që seanca të jetë e suksesshme, ndërsa shprehet se posti i presidentit nuk duhet të jetë pengesë pasi që duet të ketë mirëbesim mes dy palëve.

“Dua që koalicioni të lidhet para datës 26, që seanca të jetë e suksesshme, çështja  e Presidentit duhet të diskutohet, nuk duhet ky post të na bllokoj sepse është çështja e mirëbesimit, do vazhdojmë të bashkëpunojmë me VV dhe nuk shoh asnjë pengesë që VV ta jap një pengesë për partnerin e saj”, tha ai.

Mustafa tha se LDK-ja është duke pritur ftesë nga VV për takimin e radhës, sapo të bëhet kjo ftesë LDK do të jetë e gatshme.

“Takimi i radhës do të jetë kur të na ftojnë, ne jemi të gatshëm, me siguri kanë çështje të tjera këto ditë në Lëvizje, po sapo të na ftojnë ne do të pranojmë”, shtoi ai.

Mustafa po ashtu ka komentuar deklaratat e Kurtit lidhur me takimin e sotëm të LDK-së me këshillin e saj, ai tha se nuk i komenton takimet e strukturave të VV-së përderisa ai nuk e bën këtë edhe Kurti nuk duhet t’i komentoj në atë mënyrë.

Sipas tij, Këshilli i LDK-së duhet të jenë të informuar për procesin e negociatave VV-LDK.

“Nuk shoh arsye ta diktoj unë Kurtin se a mban takim me strukturat e VV, ai duhet ta di, ne takimet i mbajmë në bazë të autoritetit dhe bazës që kemi nga LDK dhe kemi qëllim që anëtarësia dhe struktura të jenë të informuar se çfarë po bëjmë që ata të kenë njohuri, koalicioni i ardhshëm duhet të jetë i qëndrueshëm”, tha Mustafa.