Nëna dhe njerku rrahin vajzën 12-vjeçare, e mitura ikë nga shtëpia dhe kërkon ndihmë në Polici

Jo rrallëherë fëmijët janë viktima të dhunës qoftë nga prindërit e tyre apo edhe anëtarë të tjerë të familjes. Në shumicën e këtyre rasteve, fëmijët janë edhe të moshës së mitur, ndaj të cilëve ushtrohet dhunë fizike e psikike. Kështu ka ndodhur së fundmi në një familje në Ferizaj, raporton Gazeta Sinjali.

Burimet nga Prokuroria bëjnë me dije se këtë herë viktimë është një vajzë 12-vjeçare, ndaj të cilës dyshohet se ka ushtruar dhunë fizike nëna dhe njerku i saj, me të cilët dyshohet se kanë pasur mosmarrëveshje.

Siç mëson Sinjali, rasti u zbulua pasi vajza vendosi që të largohet nga shtëpia dhe më pas ta njoftojë Policinë për atë që kishte ndodhur.

Si rezultat i raportimit, të dyshuarit janë shoqëruar në stacion policor për intervistim, ku kanë dhënë deklaratat lidhur me denoncimin kundër tyre.

Pas përfundimit të procedurave policore, Prokurori i Shtetit ka marrë vendim që ndaj të dyshuarit kryesor të iniciohet rasti nën dyshimet për kryerjen e veprës penale “Dhuna në familje” dhe i njëjti të dërgohet në mbajtje.