Në Podujevë u përkujtua 31-vjetori i helmimit të mijëra shqiptarëve nga regjimi serb

Përfaqësues të personave të helmuar nga regjimi serb në marsin e vitit 1990 dhe Komuna e Podujevës organizuan sot një akademi përkujtimore në 31 vjetorin e helmimeve të nxënësve, studentëve, profesorëve, punëtorëve dhe qytetarëve të Podujevës dhe Republikës së Kosovës.

Në këtë akademi të organizuar në përkujtim të kësaj ngjarje tragjike, morën pjesë persona që kishin pësuar nga helmimet, familjarë të tyre, udhëheqës komunalë, mësimdhënës, artistë dhe krijues letrarë dhe qytetarë të Podujevës.

Nënkryetarja e Komunës së Podujevës, Marigona Lahu tha se “me dhimbje të madhe kujtojmë të gjithë ata që pësuan nga këto helmime, me shpresën se një ditë kryerësit e kësaj vepre kriminale do të përgjigjen para organeve të drejtësisë dhe shteti serb të paditet për krimet e bëra mbi popullatën civile të Kosovës”.

“Helmimet masive të nxënësve nëpër shkolla ku kryesisht mësonin shqiptarët, filluan në mars dhe vazhduan gjatë gjithë  pranverës së vitit 1990. Numri i të prekurve nga helmimi toksik shkoi mbi 7000, e Komuna e Podujevës ishte prej më të prekurave me mbi 1500 të helmuar”, tha nënkryetarja Lahu.

“Akti i helmimit të fëmijëve shqiptarë në shkolla, kopshte fëmijësh si dhe punëtorëve në fabrika e uzina shpërfaqi fytyrën e vërtetë të regjimit fashist serb, i cili nuk zgjodhi mjete, moshë e gjini për të arritur synimet e veta për t’i dëbuar shqiptarët nga trojet e tyre shekullore”, tha nënkryetarja Lahu.

Ndërsa, Nazmi Bajra, ish-punëtor i arsimit në atë kohë, i cili edhe vetë pësoi nga helmimi, përkujtoi këtë ngjarje me një monolog të përgatitur.

Për helmimet e vitit 1990 foli edhe dr. Shyqri Dumani si dhe dy të helmuarit e asaj kohe, profesor Idriz Gashi dhe Lutfi Ismaili, të cilët rrëfyen tmerrin e përjetuar 31 vite më parë.

Ndiqeni një video nga QKUK e asaj kohe: