Ndalohet nga Policia drejtori i “VisaMetric”

Prokuroria Themelore në Prishtinë ka njoftuar se është ndaluar drejtori i kompanisë “Visametric” për “Mosekzekutim të vendimeve gjyqësore”, shkruan Gazeta Online Reporteri.net.

Sipas njoftimit për media, prokurorja e shtetit pas marrjes së deklaratës nga i pandehuri S.O. shtetas turk, me aktvendim e ka ndaluar të njëjtin në kohëzgjatje prej 48 orësh.

“Gjithashtu, ju njoftojmë se brenda afatit ligjor, prokurorja e çështjes, ndaj të njëjtit do t’i ndërmerre veprimet e mëtejme ligjore, derisa iu bëjmë të ditur se lidhur me këtë rast janë duke u zhvilluar hetimet deri në epilogun përfundimtar të kësaj çështjeje penale”, thuhet në njoftim.

Gjykata Komerciale e Republikës së Kosovës ia kishte ndaluar kompanisë Visametric që t’ua merrte qytetarëve nga 30 euro për shërbimin postar të dërgimit të pasaportës. Edhe përkundër këtij vendimi,  Visametric po vazhdonte të merrte shumën 30 euro.

Kjo, ani pse shkalla e parë dhe shkalla e dytë e kësaj gjykate kishin marr vendim që t’ia ndalonin “VisaMetric” që t’i detyrojë qytetarët të paguajnë nga 30 euro për shërbime postare,.

Ministria e Industrisë, Ndërmarrësisë dhe Tregtisë ka urdhëruar kompaninë VisaMetric që të rimbursojë qytetarët për “pagesa të paarsyeshme”, si për shërbimin e dërgesës me postë të pasaportës në shumën prej 30 eurosh. Kjo pasi qytetarët dërguan një mori kërkesash në drejtim të MINT, për ta trajtuar rastin.