“Ndalja e pagave” Agim Veliu i ka disa fjalë për Albin Kurtin – Qeveri e mashtrimit

Deputeti i Lidhjes Demokratike të Kosovës Agim Veliu njëherit ish kryetar i komunës së Podujevës  ka reagur për ndaljen e pagave të grevistëve në arsim, raporton Gazeta Blic.Ai e ka quajtur qeverinë Kurti mashtruese duke bërë thirrje për reagim dhe presion opozitar e qytetar mbi qeverinë që pagat e mësimdhënësve të procesohen menjëherë.

Sipas tij “Qeveria e shpresës” çdo ditë e më shumë po e tregon fytyrën e vërtetë.Reagimi i plotë:

Ndodhi greva në sektorin publik dhe kjo qeveri po tregon se është qeveri e ndëshkimit.

Po vërtetohet se Kurti me kabinetin e tij qëllimisht iu shmang dialogut dhe ndërprerjes së grevës në arsim me qëllim që t’i tregojnë “muskujt” karshi mësimdhënësve.

Ndodhi ajo që edhe mund të pritej, qeveria e mashtrimit ndëshkoi mësimdhënësit dhe duke mos ua procesuar pagat, i la pa bukën e gojës mbi 20 mijë familje.

Në kohën e inflacionit më të lartë që nga paslufta, ngritjes enorme të çmimeve dhe kur qeveria e mashtrimit po paralajmëron dimër të rëndë energjetik, shumica e mësimdhënësve nuk do të marrin paga as në nëntor.

Pagat e tyre do të jenë peng i bankave, duke paguar dy këste të kredisë e me kamata ndëshkuese.

Prandaj, më shumë se kurrë nevojitet reagim dhe presion opozitar e qytetar mbi qeverinë e mashtrimit që pagat e mësimdhënësve të procesohen menjëherë.