Ky është drejtori i Inspeksionit në kabinetin e Shpejtim Bulliqit
Mustafa i reagon Haradinajt: Reformat në administratë s’bëhen me shantazhe e kërcënime
Kryeministri në largim, Isa Mustafa ka thënë se reformat në administratë nuk bëhen me shantazhe e masa të dhunshme por me analiza të detajuara e projekte konkrete.
Këto komente Mustafa i ka bërë duke i reaguar Ramush Haradinajt, i cili tha se do të shkojnë në shtëpi gjithë ata zyrtarë të Shtetit që nuk i kryejnë punët për çka paguhen.
Mustafa e ka lavdëruar Qeverinë e Kosovës duke thënë se ka bërë reforma në administratë.
“Të gjitha këto i bëmë me projekte konkrete dhe analiza të detajuara, e jo me masa të dhunshme, kërcënime, shantazhe siç po na sugjerohet këto ditë!”, ka shkruar Mustafa, në një reagim në FB.
Pastaj ka treguar për punët, që sipas tij, ka bërë Qeveria gjatë dy viteve e gjysmë.
“Gjatë dy vite e gjysmë bëmë reforma të konsiderueshme në administratën shtetërore. Vumë në binarë shumë institucione, duke përfshirë ATK-në dhe Doganën, ndaluam shpërdorimet administrative dhe financiare. Së bashku me Ambasadën Britanike krijuam standardin e zgjedhjes me transparencë maksimale të drejtuesve në pozita të larta të institucioneve publike. Funksionalizuam edhe prokurimin elektronik, që kontribuon në luftën kundër korrupsionit në administratë”, ka shtuar ai.
Kandidati për Kryeministër i koalicionit PDK-AAK-NISMA, Ramush Haradinaj, të shtunën, nga Rahoveci, kishte paralajmëruar se kushdo që punon në administratën e Shtetit dhe nuk kryen punën siç duhet do të shkojë në shtëpi.
Ka thënë se nëse është nevoja do të zbrazet krejt administrata për të sjell njerëz adekuat për të punuar në shërbim të qytetarëve.
“Nëse është nevoja krejt e zbrazim. Nuk na duhen shefa shumë. Kush nuk kryen punë shkon te shtëpia”, ka deklaruar Haradinaj.
Pas kësaj deklarate, LDK lëshoi një reagim, duke thënë se koalicioni i territ nuk mund t’i shantazhojë shërbyesit civilë.
Mustafa e Haradinaj kanë prishur raportet prej kohës së VLAN’it, kur Mustafa shkoi në koalicion me PDK’në, duke mos ia mundësuar Haradinajt të bëhet Kryeministër.
Mirëpo, më vonë, Haradinaj bashkë me Kadri Veselin e Fatmir Limajn votuan mocionin e këtij të fundit për rrëzimin e Qeverisë.
Tash, në zgjedhjet e 11 qershorit, Haradinaj shkon në koalicion parazgjedhor me PDK’në e NISMA’n, kurse, LDK kandidoi Avdullah Hotin për Kryeministër në një koalicion me AKR’në e Alternativën.
