Mungon njëri nga të akuzuarit, sërish dështon gjykimi për manipulim në Podujevë të rezultateve në zgjedhjet e vitit 2010 (Foto)

Mungesa e të akuzuarit për manipulim me rezultatet e zgjedhjeve të vitit 2010, Arsim Nazifi ka bërë që të dështojë seanca fillestare ndaj tij dhe të bashkakuzuarve Blerim Emini, Ejup Emini, Sami Azemi, Milazim Berisha, Shkelzen Jaha, dhe Dafina Shabani.

Ata akuzohen se në zgjedhjet e vitit 2010, në fshatin Luzhan të Komunës së Podujevës kanë manipuluar 534 vota të partive të ndryshme dhe për këtë shkak procesi i votimit është dashur të përsëritet.

Në seancën e shqyrtimit fillestar, të mërkurën në Gjykatën Themelore në Prishtinë, gjykatësi Beqir Kalludra ka deklaruar, se për të akuzuarin Arsim Nazifi ka lëshuar urdhëresë për verifikimin e vendbanimit dhe sipas informatës zyrtare të pranuar nga stacioni policor i Podujevës, ai gjendet jashtë vendit.

Mbrojtësja e të akuzuarit Nazifi, avokatja Teuta Zhinipotoku, gjithashtu ka deklaruar se i akuzuari Nazifi gjendet jashtë vendit dhe ai ka premtuar se në një të ardhme të afërt do të jetë i pranishëm.

Në mungesë të kushteve, gjykatësi Kalludra e ka shtyrë seancën më 15 tetor 2018, ora 9:00.

Edhe seanca e paraparë të mbahej më 27 gusht të këtij viti, kishte dështuar të mbahej, pasi përveç Arsim Nazifit kishte munguar edhe i akuzuari tjetër, Blerim Emini.

Ndryshe, në bazë të aktakuzës së 1 prillit 2015, prokuroria pretendon se më 12 dhjetor të vitit 2010, të akuzuarit, në cilësinë e anëtarëve të Komisionit Qendror të Zgjedhjeve, të partive të ndryshme politike, në bashkëveprim me njeri tjetrin kanë manipuluar rezultatet e zgjedhjeve.

Sipas prokurorisë, të akuzuarit kanë manipuluar 534 vota të partive të ndryshme dhe për këtë shkak procesi i votimit është dashur të përsëritet.