Mocioni për rrëzimin e Qeverisë merr përkrahje edhe nga një deputet i pavarur

Mocioni për rrëzimin e Qeverisë së Kosovës i propozuar nga lideri i Nismës, Fatmir Limaj ka arritur që brenda pak ditëve të gjejë përkrahje nga dy partitë opozitare, Aleanca për Ardhmërinë e Kosovës dhe Lëvizja Vetëvendosje, por në këtë mes janë futur edhe disa deputetë të pozitës.

Mirëpo, kjo iniciativë ka hasur tashmë edhe në përkrahjen e deputetit të pavarur, Gëzim Kelmendi. I kontaktuar nga Indeksonline, kryetari i partisë “Fjala” ka thënë se është pro këtij propozimi.

“Iniciativa për rrëzimin e qeverisë është e mirëpritur ngase nuk është duke funksionuar koalicioni qeverisës, fushata parazgjedhore ka filluar nga dy partitë PDK dhe LDK. Të dy këto parti po presin të shpallen zgjedhjet, por po presin hapin se kush do ta bëj i pari, ngase nuk dëshirojnë ta marrin rolin e ” mosrespektuesit  të koalicionit”, ka thënë Kelmendi.

Sipas tij, ky mocion është i dëshiruar veçanërisht për PDK-në e cila në konventën e fundit dha mesazhin për zgjedhje të parakohshme.

“Përndryshe, arsyeja kryesore e prishjes së koalicionit është e njëjtë me atë të vitit 2014, mospërkrahja e themelimit të ushtrisë nga deputetët serb”, ka shtuar Kelmendi, shkruan Indeksonline.

Deputeti i pavarur gjithashtu ka theksuar se për të njëjtën arsye në vitin 2014, por edhe tani ka dalë në skenë mocioni për rrëzimin e qeverisë.

“Dhe për këtë arsye edhe në vitin 2014 edhe tash doli në skenë mocioni për rrëzimin e qeverisë i cili u mbështet me shumicë votash, dhe  besoj se edhe ky mocion do të mbështetet me shumicë votash”, ka përfunduar Kelmendi.

Ndryshe sipas deputetëve të Nismës për Kosovën, pritet që në ditët e para të kësaj jave të fillojnë edhe konsultat lidhur me mocionin për rrëzimin e Qeverisë Mustafa. /Indeksonline/