MKRS investon 2 milionë euro në renovimin e Stadiumit “Zahir Pajaziti” në Podujevë

Ministria e Kulturës, Rinisë dhe Sportit (MKRS) dhe Komuna e Podujevës kanë nënshkruar një Memorandum Bashkëpunimi, përmes të cilit do të realizohet një investim prej 2 milionë eurosh për renovimin e Stadiumit të Qytetit “Zahir Pajaziti”.

Ky projekt madhor do të modernizojë tërësisht infrastrukturën sportive, duke ofruar kushte më të mira për sportistët, klubet dhe komunitetin lokal. Punimet do të kryhen sipas standardeve bashkëkohore të arkitekturës dhe inxhinierisë, duke e shndërruar stadiumin në një hapësirë funksionale, të sigurt dhe moderne.

Ndër punimet që parashihen janë: ndërtimi i tribunës lindore, vendosja e mbulesës në tribunat ekzistuese dhe instalimi i ndriçimit të plotë të fushës.

Memorandumi u nënshkrua nga Sekretari i Përgjithshëm i MKRS, Bislim Bislimi, dhe Kryetari i Komunës së Podujevës, Shpejtim Bulliqi, të cilët theksuan se ky investim është një hap i rëndësishëm në mbështetjen e sportit dhe zhvillimit të aktiviteteve sportive në Podujevë, si pjesë e angazhimit të MKRS për përmirësimin e infrastrukturës sportive në gjithë vendin.