Ministria se Infrastrukturës e gjenë “fajtorin” pse po zvarriten punët në zgjerimin e rrugës Prishtinë-Podujevë

Shirat dhe kontekstet pronësore zvarrisin punët në zgjerimin e rrugës Prishtinë-Podujevë.

Zgjerimi i rrugës Prishtinë-Podujevë nuk po shkon ashtu siç është paraparë. Të paktën kështu po thonë banorët e kësaj pjese.

Edhe pse një pjesë e rrugës me vetëm 1.8 kilometra largësi pritej të përfundoj shpejt, ajo ka më shumë se tre muaj që nuk ka arritur të përfundohet. E për këtë më të shqetësuarit janë banorët, tashmë në fillim të vitit të ri shkollës, pasi rruga që po ndërtohet gjendet përbri shkollës “Kongresi i Manastirit” në fshatin Gllamnik.

Por në Ministrinë e Infrastrukturës fajin për mos përfundimin e kësaj pjese brenda afatit të paraparë ia kanë lënë shirave të mëdha dhe të shpeshtë. Sipas, Argjend Zejnaj nga ky dikaster në kushte të lagështisë nuk lejohet zhvillimi i punimeve.

“Siç e dimë te gjithë këtë vit ka pasur reshje të shpeshta dhe të mëdha të shirave të cilat shkaktojnë pengesa të mëdha në zhvillimin e punimeve në rrugë, dhe kjo ka qenë një nga shkaktarët kryesor që kompania nuk ka pasur mundësi t’i zhvillojë punimet më shpejtë, sepse në kushte te lagështisë së tepërt nuk lejohet zhvillimi i punimeve dhe krejt kjo sipas kushteve teknike, rregulloreve dhe standardeve të paraparë për këto punë” është shprehur ai për Indeksonline.

Këshilltari  për media pranë Ministrisë së Infrastrukturës, ka vënë në pah edhe problemet me kontekstet pronësore në pjesën afër shkollës ku po ndërtohet edhe një nënkalim. Por, ai ka thënë se më këto probleme duhet të angazhohet edhe komuna, ndonëse Ministria po punon në gjetjen e një zgjidhje adekuate.

“Është e çertet që bëhet fjalë për një pikë shumë të ndjeshme, por tash për tash është kjo situate dhe për të njejtën duhet që të angazhohet edhe komuna e Podujevës që të flas me banoret, pronat e te çileve mund t’i prek ndërtimi i këtij nënkalimi, sepse për to ka pengesa nga pronarët e tokave, ku nuk është lejuar zhvillimi i punimeve, ne po punojmë në gjetjen e një zgjidhje adekuate, në mënyrë që punimet të mos ndalen dhe projekti të vazhdoj së implementuari siç edhe është paraparë me planin dinamik” ka thënë Zejnaj për Indeksonline.

Zhvillimi i komunikacionit në muajit korrik dhe gusht u vështirësua shumë për shkak të numrit të madh të veturave, për këtë arsye edhe punimet në rrugë u ndanë në pjesë.

Zejnaj ka theksuar se tashmë janë përfunduara punët e infrastrukturës deri te shtresat përfundimtare të tamponit për përgatitje për asfaltim, kështu që së shpejti fillohet me asfaltim segment pas segmenti. Ku sipas tij, asfaltimi pritet të fillojë pas një jave.

Ndryshe, në tërësi i gjithë projekti i zgjerimit të rrugës nacionale Prishtinë-Podujevë është paraparë që të përfundohej për tre vite./Indeksonline/