Ministri i Shëndetësisë Rifat Latifi i vjen për vizitë Shpejtim Bulliqit në Podujevë

Kryetari Bulliqi priti në takim Ministrin e Shëndetësisë, Rifat Latifi, me të cilin diskutuan për projektet prioritare të shëndetësisë në Komunën e Podujevës, njofton PodujevaPRESS.net

Siç ka shkruar Bulliqi në faqen e tij në facebook:

Në Podujevë patëm nderin ta presim për vizitë Ministrin e Shëndetësisë, Rifat Latifi dhe stafin e tij. Me ministrin Latifi biseduam për projektet me prioritet në shëndetësinë llapjane.

E informova për projektin e ndërtimit të Urgjencës së Qytetit, ku së shpejti pritet të fillojnë punimet në realizimin e këtij projekti shumë të nevojshëm për qytetarët e Podujevës.

Ndërsa unë kërkova nga Ministri Latifi që objektin shëndetësor afër shkollës “Enver Maloku” ta funksionalizojmë me shërbime specialistike, ku edhe i vizituam hapësirat e këtij objekti, derisa të ndërtohet Spitali i Përgjithshëm i Podujevës.

Poashtu gjatë takimit kërkova rritje të stafit shëndetësor, sepse me numrin aktual është e vështirë të ofrohen shërbime cilësore dhe sipas nevojave të qytetarëve llapjanë.

U pajtuam që të bashkëpunojmë ngushtë si institucione në avancimin e shërbimeve dhe kompletimin e infrastrukturës shëndetësore në Podujevë.