Ministri i Mbrojtjes Armend Mehaj viziton familjen e Hasan Ramadanit

Në një postim ministri i mbrojtjes Armend Mehaj ka treguar se i ka bërë një vizitë familjes së heroit Hasan Ramadani në fshatin Shajkovc të Podujevës, njofton PodujevaPress.net

Ky është njoftimi:

Familja Ramadani në fshatin Albanik, sot hapi derën e shtëpisë për të na pritur bujarisht, ashtu siç historikisht bëri kjo familje.

Emrat e vendbanimeve për popullin shqiptar kanë qenë gjithmonë të bazuara në karakteristikat e vendeve, kështu edhe emërtimi i fshatit Albanik në Komunën e Besianës nuk ishte rastësor, ky fshat ishte vendlindja e burrave trima siç ishte edhe dëshmori Hasan Ramadani, që në varfërinë e instaluar nga pushtuesi serb, atdheun e nacionalitetin e konsideronte pasurinë e tij më të madhe, për të cilat flijimi i jetës ishte pak, e angazhimi për liri ishte obligim.

Nga mërgata iu kthye tokës dardane që kërkonte bijtë e tij, protestave studentore të 81′ që Kosovën e donin Republikë.

Nga anëtar i LPRK-së, në luftëtar të Çetës së Llapit, me të vetmin synim çlirimin e vendit, dhënies fund të hegjemonisë serbe.

Hasani deri në çastet e fundit i qëndroi besnik shprehjes së tij “Kthim prapa nuk ka”.

Ra dëshmor pas një lufte të ashpër me policinë serbe, që për ta dëshmuar stoikisht qëndrojnë edhe sot e kësaj dite në këmbë muret e kullës në Albanik, muzet si simbol i idealizmit kombëtar.

Do u jemi mirënjohës e do t’i kujtojmë të gjithë dëshmorët, dhe ata që kontribuan përgjatë rrugëtimit aspak të lehtë të popullit shqiptar.

Lavdi të rënëve për lirinë e vendit!