Mijëra euro llogaritet të jetë dëmi nga vërshimet e së martës në Podujevë | PAMJE

Shefqet Llumnica e Avdyl Hyseni nga fshati Bellopojë i Podujevës nuk kanë mundur t’i bëjnë gati perimet e tyre për treg. Për shkak të përmbytjeve që ndodhën ditën e martë, ky mund të jetë edhe fundi i parakohshëm i sezonit për këta fermerë.

Ata thonë se për shkak të këtyre vërshimeve kulturat bujqësore pothuajse u janë prishur dhe dëmi llogaritet të jetë goxha i madh. Sipas tyre, tash nuk mjafton koha për t’i mbjellë këto kultura edhe një herë.

Ai thotë se vetëm në një vend i ka një hektar të mbjellë me speca, lakra, majdanoz e brokolli. Ndërsa, dëmi, sipas tij, arrin deri në 8 mijë euro, pa i llogaritur edhe 2 mijë euro të tjera, që i kanë kushtuar sistemi i ujitjes dhe farërat, raporton KOHA.

E fermeri tjetër Avdyl Hyseni thotë se e ka gjysmë hektari të mbjellë me qepë, spinaq, e të tjera dhe se dëmi që i është shkaktuar nga vërshimet vetëm për mallin e gatshëm është 1 mijë e 200 euro.

Përveç në bujqësi, dëme nga vërshimet ka pasur edhe në ekonomi familjare. Uji që ka dalë nga shtrati i lumit dhe i një përroske në fshat ka depërtuar edhe në oborre e shtëpi. Banorët madje ende nuk patën mundësi të largojnë ujin nga shtëpitë.

Në anën tjetër, zyrtarët komunalë të Podujevës nëpërmjet një përgjigjeje me shkrim kanë thënë se në disa vende deri te vërshimet ka ardhur edhe si pasojë e ngushtimit të shtretërve të lumenjve dhe përroskave dhe mbylljes së kanaleve të ujërave atmosferike nga vetë banorët.

Zëdhënësi Nazmi Elezi thotë se Komuna do të ndërmarrë masa për të sanuar problemet tek kanalet e mbyllura atmosferike dhe atje ku janë ngushtuar shtretërit e rrjedhës lumenjve dhe përroskave. Por, ndihmë materiale nga komuna nuk pritet të ketë.

Banorët thonë se vërshimet ndodhin në këtë pjesë të Podujevës sa herë që ka reshje të dendura të shiut, por deri tash, sipas tyre, Komuna nuk ka arritur t’i evitojë problemet.