MI: Të gjitha rrugët janë të kalueshme, kujdes nga ngricat!

Zëvendësministri i Infrastrukturës, Rexhep Kadriu ka thënë në një prononcim për Telegrafin se gjendja e rrugëve në tërë Kosovën është e mirë dhe komunikacioni po zhvillohet pa pengesa.Ai ka bërë të ditur se nga ora 5 e mëngjesit të ditës së hënë ka filluar hedhja e kripës nga kompanitë e angazhuara për mirëmbajtjen e rrugëve.“Në bazë të raportit nga tereni, të pranuar nga menaxherët në ora 8:00, gjendja e rrugëve magjistrale dhe nacionale është e mirë. Të gjitha rrugët janë të kalueshme – nuk kemi asnjë bllokim të asnjë rruge dhe komunikacioni zhvillohet pa pengesa”, tha Kadriu.

Po sipas tij, kompanitë e kontraktuara i kanë marrë të gjitha masat për pastrimin e rrugëve.“Edhe pse temperaturat janë të ulëta, të cilat shkojnë nga -2 deri -10, kompanitë e mirëmbajtës janë në teren dhe po bëjnë pastrimin e rrugëve dhe hedhjen e kripës, që nga mëngjesi”.Gjithsesi, Kadriu ka apeluar për kujdes të shtuar në komunikacion për shkak të ngricave.

“Apelojmë te qytetarët për kujdes të shtuar për shkak të ngricave dhe fryma e cila po mbretëron në disa pjesë të Kosovës dhe po bart borën nga brezi i rrugës”, bën thirrje Kadriu.Ndryshe, temperaturat në minus sipas meteorologëve do të vazhdojnë edhe gjatë ditëve të ardhshme të kësaj jave. /Telegrafi/