MI-ja pretendon ta kryejë shpejt rrugën Podujevë-Prishtinë, që s’u bë për 6 vjet

Gjashtë vjet kanë kaluar nga nisja e punimeve në zgjerimin e rrugës Prishtinë-Podujevë. Ani se që atëherë ka pasur premtime e afate të njëpasnjëshme për përfundimin e tyre, punimet ka kohë që janë pezulluar në fshatin Llugë të Podujevës. Banorët shprehen të shqetësuar për dinamikën dhe cilësinë e punimeve. E nga Ministria e Infrastrukturës kanë thënë se punimet në terren kanë nisur dhe se segmenti rrugor deri në Lluzhan – Gllamnik do të përfundojë deri para fillimit të sezonit veror

Pa u zgjeruar ka mbetur pjesa e rrugës që kalon mbi urë në afërsi të qytetit të Podujevës. Por kjo nuk është e vetmja në këtë anë që ka mbetur pa u përfunduar.

Punimet për projektin e zgjerimit të rrugës nacionale në segmentin: rrethrrotullimi Besi-Podujevë, që ka nisur më 2016, ka kohë që janë pezulluar. Që atëherë, edhe pjesa e asfaltuar vite më parë është dëmtuar dhe si pasojë asfalti këto ditë është duke u gërryer dhe gropat në të po mbulohen pjesë-pjesë.

Edhe ato punime që janë kryer deri më tani, sipas banorëve e ngasësve janë me shumë mangësi. Rregullimi i trotuareve, i hyrje-daljeve, shpronësimet, ritmi i ngadalshëm i punimeve e cilësia e tyre, janë disa nga telashet që i përmendin ata.

Banori Ibish Berisha thotë se që nga fillimi, asnjëherë nuk është punuar me dinamikë të përshpejtuar.

“Gjithmonë prej ndërrimit të qeverive në tjetrën, kurrë njëherë nuk ka pasur një intensitet të punës më të mirë. Nuk ka pasur një dinamikë të shtuar, por nuk ka pasur as një kontroll ashtu sa duhet, që t’i kushtohet vëmendje kësaj rruge, kur dihet që është një frekuentim shumë i madh i qarkullimit të automjeteve. Na lidh kufiri në Merdar. Është një rrugë mjaft e ngarkuar dhe ka mbetur e pazgjidhur”, ka thënë Berisha.

Ai ka kërkuar nga Ministria e Infrastrukturës që të trajtojë me seriozitet këtë rrugë, dhe çështjen e shpronësimeve.

“Për çështjen e shpronësimit, kurrë nuk na është dhënë sqarim konkret që ta dimë se çfarë vendimi është marrë dhe çfarë duhet të bëhet. A kemi të drejtë ne ta pengojmë shpronësimin. Kërkojmë një sqarim”, ka thënë Berisha.

E banori Nazmi Berisha pretendon se në punime nuk është përmbushur asnjë kriter i kërkuar.

“Pushteti është punëdhënës dhe pushteti duhet me qenë organ mbikëqyrës në këtë rrugë dhe jo ai që e kryen punën. Çështja e tij është veç çështje biznesi, atij i intereson se çka i mbetet në fund të rrugës, tjetër gjë ai nuk mendon. Por për këtë është organi mbikëqyrës që duhet me qenë 12 orë në rrugë. Unë qe 6 vjet nuk kam parë të tillë në këtë rrugë”, ka thënë Berisha.

Në hall me këtë rrugë nuk janë vetëm banorët që e rrahin çdo ditë atë. Muhamet Musliu, i cili këto ditë ka ardhur për pushime nga Suedia, tregon për telashet që ia sjellin shtëpisë së tij, fare pranë rrugës.

“Rruga këtu na shkakton telashe, unë kam ardhur dje prej rrugës. Këtu para dyerve të mia i kam gjetur katër, pesë gurë, e është dashur të zbresë me bashkëshorten dhe t’i largoj për me hy brenda. Sot kam dalë, kam kërkuar inxhinier me bisedu me të, po nuk ia dola, më thanë nesër vjen”, ka thënë Musliu.

Në Ministrinë e Mjedisit, Planifikimit Hapësinor dhe Infrastrukturës, përmes një përgjigjeje me shkrim thonë se janë duke mbikëqyrur projektin dhe janë duke bërë përpjekje t’i zgjidhin problemet teknike.

“Edhe ky projekt, sikurse të gjitha projektet që financohen nga MMPHI-ja, mbikëqyren nga ana e menaxherëve tanë dhe po ashtu, sipas nevojës, ne formojmë edhe komisione profesionale, përmes të cilave zgjidhen problemet teknike. Ne jemi duke bërë përpjekje që për komplet segmentin nga Lluzhani deri në Podujevë t’i zgjidhim të gjitha problemet që janë në këtë segment rrugor”, thuhet në përgjigje.

Nga kjo ministri është bërë e ditur se punimet çdoherë janë ndërprerë shkaku i problemeve pronësore, e jo të kompanive të kontraktuara.

Ministri Liburn Aliu, në seancën e 7 prillit në Kuvend, është zotuar që punimet do të nisin në prill dhe të përfundojnë brenda dy muajsh.

E mbështetur në përgjigjet e këtij dikasteri, punimet në segmentin rrugor Lluzhan- Gllamnik thonë të kenë nisur para disa ditësh, duke dhënë sërish afat kohor se kur pritet të përfundojnë ato.

“Punimet për përfundimin e aksit kryesor po synohet që të përfundojnë para fillimit të sezonit veror, për shkak të krijimit të kushteve më të mira të komunikacionit gjatë periudhës kohore, kur vijnë edhe mërgimtarët dhe që në atë kohë ka shtim të automjeteve në komunikacion”, kanë thënë nga MI-ja. “Punimet kanë filluar qe disa ditë dhe janë duke u zhvilluar me dinamikë të mirë, ne jemi në pritje që ky projekt do të përmbyllet brenda një kohe normale, edhe pse rregullisht kemi ankesa nga punëkryesi se ka vështirësi në sigurimin e materialeve, pasi që ka mungesë të madhe në treg​”, thuhet në përgjigjen e Ministrisë.

Tani në terren shihen disa makineri duke punuar në pjesët veçse të zgjeruara, por jo edhe në ato ku punimet kanë ngecur. Në fillim të majit të vitit 2018 kishte filluar zgjerimi i segmentit Luzhan-Gllamnik, me gjatësi prej katër kilometrash, e deri më tani punimet kanë arritur vetëm deri në fshatin Llugë.

Kompanitë që e kanë fituar tenderin janë konsorciumi i përbërë nga dy kompani: R&Rukolli SH.P.K. dhe NPSH Bageri SH.P.K. /KOHA.net/N.Toverlani