Më shumë se gjysma e buxhetit të Podujevës, shpenzohet për paga e mëditje

Komunarët e Podujevës shumicën e buxhetit komunal e  për paga dhe mëditje. Nga 21 milionë e 371 mijë e 177 euro, sa ka qenë buxheti fillestar i miratuar për këtë vit, 12 milionë e 64 mijë e 582 euro derdhen për paga dhe mëditje.

Kategoria e dytë buxhetore sipas shumës së mjeteve janë shpenzimet kapitale me 6 milionë e 489 mijë e 514 euro, pastaj mallra dhe shërbime me 1 milion e 924 mijë e 698 euro, subvencione me 568 mijë e 883 euro dhe në fund shpenzime komunale 324 mijë e 500 euro, shkruan sot “Koha Ditore”.

Edhe përqindjen e shpenzimeve për periudhën janar-shtator e kanë pagat dhe mëditjet. Por, në rend të dytë nuk janë edhe shpenzimet kapitale, siç janë të renditur sipas shumës së paraparë për këtë vit.

“Shpenzimet e buxhetit për periudhën janar-shtator kanë arritur në shumën 11,908,637euro dhe atë për paga dhe mëditje janë shpenzuar 8,807.072 euro, për mallra dhe shërbime 808,786 euro, për shpenzime komunale 215,981 euro, për subvencione dhe transfere janë shpenzuar në shumën prej 217,066 euro, si dhe për investime kapitale 1,859,732 euro”, thuhet në raportin financiar nëntëmujor.

Ditën kur ishte miratuar ky raport, këshilltarët opozitarë kishin adresuar kritika për mënyrën e shpenzimeve të parasë publike nga ana e zyrtarëve komunalë./Nexhat Tovërlani