Me rrëzimin e qeverisë figurat kryesore të VV’së s’do të jenë as deputetë

Ishte një përpjekje e gjatë e Albin Kurtit dhe Vetëvendosjes për të ardhur në pushtet, dhe në momentin kur e arriti këtë, nuk mundi ta vazhdojë as për dy muaj. Kurti vetë e kishte thënë se VV është partia që më së gjati ka qëndruar në opozitë, dhe duket se sërish atje po përfundon.

Partneri i Kurtit në koalicion, LDK dje vendosi që të iniciojë mocion mosbesimi për qeverinë, dhe menjëherë sot filloi negociatat me partitë opozitare për këtë.

Ajo që tani dihet, qeveria Kurti i ka ditët e numëruara. Pas kësaj me shumë gjasë nuk do të shkojmë në zgjedhje, edhe shkaku i virusit që ka prekur të gjithë botën. Pra, pritet që të kemi një qeveri të LDK’së me AAK’në dhe Nisma, ose një qeveri e spektrit të gjerë, që përfshinë edhe PDK’në, por pa VV’në, shkruan Gazeta Online Reporteri.net.

VV pas kësaj, përveç që do të dalë nga qeveria, edhe pse si parti me numrin më të madh të deputetëve, në Kuvend nuk do të përfaqësohet me figurat e saj kryesore.

Albin Kurti, Glauk Konjufca, Xhelal Sveçla, Albulena Haxhiu, Arben Vitia, Haki Abazi, Besnik Bislimi, e emra të tjerë të rëndësishëm të kësaj partie, nuk do të jenë as deputetë. Grupi parlamentar i VV’së, në këtë rast parti opozitare, në Kuvend do të jetë e përfaqësuar kryesisht me emra të rinj, pa përvojë të gjatë në të bërit opozitarizëm. /Reporteri.net