Me ekspozitë, Podujeva synon ta nxisë leximin

Nxitjen e leximit nëpërmjet një ekspozite po e synon Drejtoria për Kulturë, Rini dhe Sport në Komunën e Podujevës.

Ky institucion, në hapësirat e Galerisë së Arteve ka hapur ekspozitën e librit për të shënuar kështu Ditën Ndërkombëtare të Librit.

Drejtori Pajtim Balaj, ka thënë se ky organizim tashmë është bërë tradicional.

“Ekspozita është tradicionale. Organizimi i parë ka qenë diku pas lufte dhe prej asaj kohe vazhdimisht për çdo vit, më 23 prill, në shënim të Ditës Ndërkombëtare të Librit, biblioteka ekspozon disa nga librat e fondit të saj. Qëllimi është që t’u ofrohet qytetarëve një pasqyrë se çfarë përmban biblioteka, por edhe të nxiten qytetarët drejt leximit”, ka thënë Balaj për KOHËN.

Ai thekson se për këto dy ditë sa është e hapur kjo ekspozitë ka vizitorë të ndryshëm dhe pjesa më e madhe e tyre, sipas tij, janë nxënësit, të cilët të organizuar nga mësimdhënësit e tyre, vizitojnë hapësirat e Galerisë. Drejtori për Kulturë, Rini dhe Sport ka theksuar se në ekspozitë ka libra nga të gjitha zhanret dhe me autorë nga vende të ndryshme. Balaj ka bërë të ditur se ekspozita e librit do të qëndrojë e hapur deri në fund të javës./N.T./