Mblidhet Komiteti Komunal për Mbrojtje dhe Shpëtim në Podujevë
Komuna e Podujevës konkretisht kryetari i kësaj komune Agim Veliu, ka vendosur që të gjitha aktivitetet e parapara për nder të 28 Nentorit të anulohen. Njëherit ai mblodhi Komitetin Komunal për Mbrojtje dhe Shpëtim ku u analizua situata e krijuar pas tërmetit tragjik në Shqipëri, thuhet në njoftim e zyrës për informim, trasmeton PodujevaPRESS.com
Në njoftim thuhet se kryetari i Komunës së Podujevës, Agim Veliu, sot ka mbajtur takimin e Komitetit Komunal për Mbrojtje dhe Shpëtim, në të cilin është analizuar gjendja e krijuar nga tërmeti me pasoja tragjike në Shqipëri, i cili është ndjerë edhe në komunën tonë.
Takimi i Komitetit Komunal për Mbrojtje dhe Shpëtim i Komunës së Podujevës ka nisur me një minutë heshtje në nderim të viktimave të tërmetit tragjik në Shqipëri.
Në takimin e këtij Komiteti, ku ishin të pranishëm udhëheqës të institucioneve relevante komunale e të sigurisë, kryetari i Komunës, Agim Veliu, tha se që nga dita e djeshme (e martë), në koordinim me të gjitha institucionet komunale vazhdimisht kanë përcjellë situatën e shkaktuar nga rënia e tërmetit tragjik në Shqipëri e që është ndier edhe në Komunën tonë.
Kryetari Veliu, duke shprehur keqardhje të thellë për pasojat tragjike të tërmetit të rënë në Shqipëri, tha se fatmirësisht në komunën tonë nuk ka pasur ndonjë pasojë nga tërmeti.
“Ne në vazhdimësi kemi përcjellë situatën dhe në koordinim me institucionet relevante, kemi qenë të gatshëm për ta dhënë kontributin e nevojshëm në tejkalimin e gjendjes”, tha kryetari Veliu.
Kryetari Veliu tha se qytetarët janë duke shprehur gatishmërinë për të ofruar ndihma dhe strehim për qytetarët e Shqipërisë, të goditur nga tërmeti.
Komandanti i Stacionit Policor në Podujevë, kapiten Bekim Zogiani, tha se pas rënies së tërmetit, vazhdimisht ka qenë në kontakt dhe koordinim me institucionet relevante komunale. Kapiteni Zogiani tha se gjendja e sigurisë është stabile dhe nuk janë raportuar dëme nga qytetarët dhe se nuk ka pasur situata të panikut te qytetarët.
Drejtori i Drejtorisë së Shërbimeve Publike, Mbrojtje dhe Shpëtim, Faik Muçiqi, tha se nuk ka raste të dëmeve të paraqitura nga tërmeti, përveç një qytetari që ka raportuar për dëmtim të shtëpisë.
Drejtori i QKMF, Fahri Llugaliu, tha se ky institucion shëndetësor ka ngritur nivelin e gatishmërisë, por fatmirësisht nuk ka pasur ndonjë rast të paraqitur si pasojë e situatës së krijuar nga tërmeti.
Në takim u mor qëndrim që të gjitha ndihmat për të goditurit nga tërmeti të bëhen në formë institucionale, në koordinim me Komitetin Komunal për Mbrojtje dhe Shpëtim.
Gjithashtu, në takim u tha se Komitetit Komunal për Mbrojtje dhe Shpëtim i Komunës së Podujevës vazhdimisht do të jetë në kontakt më Shtabin Emergjent në nivel të Republikës dhe do t’i koordinojë të gjitha aktivitetet konform kërkesave dhe nevojës së paraqitur.
