Mbi 30 mijë euro vlera e parave të grabitura sot në Podujevë

Mbi 30 mijë është vlera e parave të grabitura sot në Podujevë, raporton IndeksOnline.

Viktima ishte punëtore e një super-marketi në Podujevë e cila derisa po i dërgonte paratë për deponim në bankë, është ndaluar nga grabitësit të cilët nën kërcënimin e armës ia morën të gjitha paratë për të ikur në drejtim të panjohur.

Burimet e IndeksOnline brenda policisë kanë thënë se punëtorja me veti kishte mbi 30 mijë euro nga pazari i marketit dhe ajo është përcjell nga grabitësit derisa ka ndodhur vepra.

Zëdhënësi i Policisë së Kosovës për Rajonin e Prishtinës, Agron Borovci ka thënë se të hënën rreth orës 09:00, është pranuar informata për një grabitje të ndodhur në rrugën “Zahir Pajaziti” në Podujevë.

“Me të marrë informatën policia ka dalë në vendin e ngjarjes dhe nga informacionet e para dyshohet që një i dyshuar nën kërcënimin e shkrepjes së armës i ka grabitur një vlerë të parave të gatshme një personi që atë moment ishte duke shkuar për të deponuar ato”, ka thënë Borovci për IndeksOnline.

Policia ka bërë këqyrjen e vendit të ngjarjes me ç’ rast ka gjetur dhe sekuestruar një gëzhojë, përderisa kanë filluar hetimet për identifikimin e të dyshuarit dhe zbardhjen e rrethanave të rastit.